Oljas Bektenov birqatar mınıstrlikke tapsyrma berdi
ASTANA.KAZINFORM – Premer-mınıstr Oljas Bektenov Úkimet otyrysynda kólik, energetıka, agroónerkásip jáne sý resýrstary salalaryna birqatar tapsyrma berdi.
Úkimet basshysy Kólik mınıstrligine barlyq kólik ótkizý beketterin salý jáne jańǵyrtý jumystaryn kelesi jyly aıaqtaýdy, «Baqty – Aıagóz» temirjol jelisin iske qosýdy, «Kókshetaý – Petropavl» kúre jolyn keńeıtýdi jáne Astanada ekinshi áýejaıdyń qurylysyn bastaýdy tapsyrdy.
– Avtojol salasyn reformalaý jónindegi jumys toby aıasynda merdiger uıymdardyń jaýapkershiligi men tehnıkalyq qadaǵalaýdy kúsheıtý jónindegi sharalar ázirleýdi tapsyramyn, – dedi Oljas Bektenov.
Energetıka mınıstrligine «Samuryq-Qazyna» qorymen birlesip, elektr stansalary jobalaryn iske asyrý merzimderiniń saqtalýyn qamtamasyz etý jáne 2035 jylǵa deıingi biryńǵaı energetıkalyq teńgerimdi qaıta qaraý mindetteldi. Sonymen qatar jańa atom elektr stansalaryn shıkizatpen qamtamasyz etý úshin ýrannyń memlekettik strategııalyq rezervin qurý tapsyryldy.
Agroónerkásip keshenin damytý baǵytynda Aýyl sharýashylyǵy mınıstrligine Ulttyq ekonomıka mınıstrligimen jáne «Báıterek» holdıngimen birlesip, mal sharýashylyǵyn, aýyl sharýashylyǵy ónimderin saqtaý men óńdeýdi qoldaýǵa arnalǵan uzaqmerzimdi nesıeleý baǵdarlamalaryn iske asyrý tapsyryldy.
Sondaı-aq Aýyl sharýashylyǵy mınıstrligi Jasandy ıntellekt mınıstrligimen birlesip, «E-Agroónerkásip kesheni» tsıfrlyq platformasyn ázirleýdi jáne 2027 jyly salalyq Data Lake qurýdy aıaqtaýy qajet.
Sý resýrstary salasynda Premer-mınıstr 15 jeltoqsanǵa deıin Sý resýrstarynyń ulttyq aqparattyq júıesiniń tolyqqandy jumys isteýin qamtamasyz etýdi tapsyrdy. Ulttyq ekonomıka mınıstrligine Sý resýrstary mınıstrligimen birlesip, 2027 jylǵy qańtarǵa deıin aýyzsýdy tutyný salasyndaǵy tarıftik reformany aıaqtaý mindetteldi.
Budan bólek, Ónerkásip jáne qurylys mınıstrligine Sý resýrstary mınıstrligimen jáne óńir ákimdikterimen birlesip, sýdy kóp tutynatyn kásiporyndardy aınalymdy jáne qaıta paıdalanylatyn sýmen jabdyqtaý júıelerine kóshirý tetikterin ázirleý tapsyryldy.
Buǵan deıin, Oljas Bektenov óńirlerdiń ınfraqurylymdyq jobalaryn jyl sońyna deıin anyqtaýdy tapsyrǵan edi.
