Oljas Bektenov «Bolashaq oıyndary-2026» týrnırine daıyndyqty tekserdi
ASTANA. KAZINFORM – Oljas Bektenov Astana qalasynyń «Bolashaq oıyndary-2026» halyqaralyq fıdjıtal-týrnırin ótkizýge daıyndyǵyn tekserdi. Bul týraly Úkimettiń baspasóz qyzmeti habarlady.
Memleket basshysynyń tapsyrmasy boıynsha Astanada 29 shilde kúni «Bolashaq oıyndary-2026» halyqaralyq fıdjıtal-týrnıri bastalady. Premer-mınıstr Oljas Bektenov Astananyń sporttyq jáne qalalyq ınfraqurylymyn úshinshi halyqaralyq mýltısporttyq týrnırdi ótkizýge daıyndaý barysymen tanysty.
Jarys Eýropa, Azııa, Taıaý Shyǵys jáne Latyn Amerıkasynyń 35 elinen myńǵa jýyq sportshynyń basyn biriktiredi. Shet memleketterdiń basshylary, halyqaralyq sport uıymdarynyń basshylyǵy jáne tsıfrlyq ındýstrııanyń iri kóshbasshy kompanııalary saltanatty ashylý rásimine qatysatyndaryn rastady.
«Bolashaq oıyndary-2026» (Games of the Future 2026) – dástúrli sport pen tsıfrlyq saıystardy biriktiretin jańa býynnyń fıdjıtal-týrnıri. Jarystar 4 alańda ótedi, olar: «Barys Arena» kópfýnktsıonaldy muz saraıy, «QAZAQSTAN» jeńil atletıkalyq sport kesheni, Jaqsylyq Úshkempirov atyndaǵy jekpe-jek saraıy jáne Beeline Arena ulttyq tennıs ortalyǵy.
Týrızm jáne sport mınıstri Erbol Myrzabosynov nysandardyń daıyndyǵy jáne olardyń gıbrıdti formatqa beıimdelýi jóninde baıandady. Tsıfrlyq jabdyqtyń úzdiksiz jumysy qamtamasyz etildi. Týrnırge qatysýshylar men qonaqtardy qabyldaýǵa arnalǵan alańdar daıyndaldy, sondaı-aq myńnan astam adamy bar eriktiler ortalyǵynyń jumysy úshin qajetti jaǵdaılar jasaldy. Qaýipsizdikke, logıstıkaǵa, sondaı-aq servıstik qyzmet kórsetý deńgeıine erekshe nazar aýdaryldy.
Týrnırge qatysýshylar 8 saıys boıynsha óner kórsetedi, olar: fıdjıtal-fýtbol, fıdjıtal-basketbol, fıdjıtal-atqyshtar, fıdjıtal-jekpe-jek, fıdjıtal-bı, Battle Royale, sondaı-aq derbes kompıýterler men mobıldi qurylǵylardaǵy MOBA (Multiplayer Online Battle Arena). Týrnırdiń jalpy júlde qory $4 mln-nan asady. Qazaqstan atynan «Bolashaq oıyndary-2026» týrnırindegi barlyq 8 saıys boıynsha 11 komanda óner kórsetedi.
Týrnır demeýshilerdiń úlken qoldaýymen ótkizilgeli otyr. Salalyq vedomstvonyń baǵalaýy boıynsha, is-sharaǵa 10 myń sheteldik týrıst keledi. Bul qonaq úı, kólik jáne servıs salalaryndaǵy qyzmetterdiń damýyna aıtarlyqtaı serpin beredi.
Premer-mınıstr týrnırdi ótkizýge qatysy bar barlyq memlekettik organdar men uıymdardyń úılesimdi jumysyn qamtamasyz etýdi tapsyrdy.
Aıta ketelik «Bolashaq oıyndary – 2026»: Astanaǵa 800-den astam qatysýshy keledi.
