Oljas Bektenov BQO-daǵy munaı-gaz ken oryndaryn tekserdi
ASTANA. KAZINFORM – Premer-mınıstr Oljas Bektenov Batys Qazaqstan oblysyna jumys sapary aıasynda Memleket basshysynyń munaı-gaz salasyn damytý jónindegi tapsyrmalarynyń oryndalý barysymen tanysty. Bul týraly Úkimettiń baspasóz qyzmeti habarlady.
Bórli aýdanynda Premer-mınıstr Qarashyǵanaq jáne Chınarev munaı-gaz kondensaty ken oryndaryna bardy. Jumys istep turǵan óndiristerdi jańǵyrtýǵa jáne olardyń júktemesine, munaı-gaz salasyndaǵy jergilikti qamtý úlesin arttyrýǵa, kadrlar daıarlaýǵa jáne basqa da máselelerge nazar aýdaryldy.
Oljas Bektenov munaı kondensatyn turaqtandyrý, tazartý jáne qaıta óńdeýmen aınalysatyn Qarashyǵanaq qaıta óńdeý kesheniniń tehnologııalyq protsesterimen tanysty. Nysan Qarashyǵanaq munaı-gaz kondensaty ken ornynyń negizgi óndiristeri quramyna kiredi. Ol – 279 mln tonna munaı men 785 mlrd tekshe metr gazdyń alýǵa bolatyn qaldyq qory bar álemdegi eń iri ken oryndarynyń biri.
«Qarashyǵanaq Petrolıým Opereıtıng B. V.» kompanııasynyń bas dırektory Marko Marsılı aǵymdaǵy óndiristik kórsetkishter men keleshegi bar jobalardy júzege asyrý josparlary, sondaı-aq áleýmettik jaýapkershilik sheńberinde qabyldanyp jatqan sharalar týraly habardar etti. Qarashyǵanaqta ótken jyly óndirý kólemi 12,2 mln tonna bolǵan, 2025 jylǵa arnalǵan jospar – 12,4 mln tonna. Qarashyǵanaqty keńeıtý jobasynyń (PRK-1A) gaz aıdaý tıimdiligin arttyrýǵa jáne óndiristik protsesterdiń turaqtylyǵyn qamtamasyz etýge baǵyttalǵan birinshi kezeńi iske qosyldy. Nátıjesinde ishki naryqqa 7,5 mlrd tekshe metr gaz jetkizildi, bul – Qazaqstandaǵy jalpy kólemniń shamamen 26%-y.
Premer-mınıstr munaı-gaz salasy ónerkásiptik ósýdiń mańyzdy draıveri bolyp qala beretinin atap ótti. Qazaqstanda jyl saıyn 85 mln tonnadan astam munaı jáne shamamen 55 mlrd tekshe metr gaz óndiriledi. Mundaı kólemdi turaqty ustap turý zamanaýı tehnologııalardy engizý men iri ken oryndaryn damytýdyń arqasynda múmkin bolyp otyr.
Búginde Úkimet óndiristi arttyrýdan bastap, qaıta óńdeýdi tereńdetý jáne munaı-gaz hımııasyn keńeıtýge deıingi batyl sheshimderimen jer qoınaýyn utymdy paıdalaný strategııasyn dáıekti túrde júzege asyryp keledi. Budan basqa, otandyq óndirýshilerdi qoldaýdyń mańyzdylyǵy jáne otandyq taýarlardy satyp alý úlesin odan ári arttyrý qajettigi de atap ótildi.
Báıterek aýdanynda Premer-mınıstr «Jaıyqmunaı» JShS-nyń taýarlyq gazdy qaıta óńdeý qýatymen tanysty. Chınarev ken orny aýmaǵynda birqatar zamanaýı qondyrǵy jumys istep tur, munda temirjol munaı quıý termınaly, gaz qubyry, vahtalyq qalashyqtar jáne taǵy da basqa ınfraqurylymdar jaqsy damyǵan. Gaz óńdeý zaýytynyń óndiristik qýaty jylyna 4,2 mlrd tekshe metr. Kásiporynnyń júktemesin arttyrý máselesi pysyqtalyp jatyr.
Buǵan deıin jyl sońyna deıin 590 myń tonna munaı-gaz óndirý josparlanǵanyn jazǵan bolatynbyz.