Oljas Bektenov: Bıznesti qoldaýdyń bıýdjetten de basqa tetikterin qaraý qajet

ASTANA. KAZINFORM – Úkimet basshysy ishki bıznesti qoldaýda bıýdjet qarajatynan bólek tetikterdi qarastyrý kerektigin aıtty.

«Qýatty ári básekege qabiletti bıznes tabysty ekonomıkanyń negizgi faktory. Bul – aksıoma. Kásipkerlikti damytý jáne qoldaý – Úkimettiń basty mindeti. Jalpy, memlekettik qoldaý saralanýǵa tıis. Joǵary deńgeıde óńdelgen ónim shyǵarýǵa, sondaı-aq shyǵarylatyn ónimniń eksporttyq áleýetine basymdyq bergen jón. Qarjylaı qoldaý óndiristiń tehnologııalyq kúrdelilik deńgeıine baılanysty kórsetilýi kerek», - dedi Oljas Bektenov Úkimet otyrysynda. 

O.Bektenovtiń aıtýynsha, kúrdeli óndirispen jáne tehnologııalardy keńinen qoldanatyn kásipkerlerge kredıtti tómen stavkamen jáne uzaq merzimge bergen abzal. 

«Otandyq bızneske qarjylandyrý qoljetimdi bolýy tıis, onyń ishinde bıýdjetten basqa kózderdi paıdalanyp, kepildik berý tetikterin keńeıtý qajet. Bul – Ulttyq ekonomıka mınıstrligi men damý ınstıtýttary úshin mańyzdy mindet. Sondaı-aq bul jergilikti kásiporyndarǵa sheteldik jetkizýshilermen básekelesýge múmkindik beredi», - deıdi ol.