Oljas Bektenov: bıznes vedomstvolar arasyndaǵy baılanystyń nasharlyǵynan zardap shekpeýi tıis

ASTANA. KAZINFORM – Úkimet basshysy Oljas Bektenov bıznes bastamalardy qarjylandyrýdy qatań baqylaýǵa alýdy tapsyrdy.

Олжас Бектенов: бизнес ведомстволар арасындағы байланыстың нашарлығынан зардап шекпеуі тиіс
Фото: Ағыбай Аяпбергенов / Kazinform

— Memlekettik organdar ınvestorlarǵa barynsha qoldaý kórsetýi tıis, mınıstrlikter men ákimdikter ınvestıtsııalyq jobalardy qoldaýǵa tikeleı jaýapty. Bıznestiń bastamalary vedomstvolardyń arasyndaǵy ózara baılanystardyń nasharlyǵynan zardap shekpeýge tıis. Salalyq mınıstrlikter jobalardyń iske asyrylýyn qatań baqylaý tetigin ázirlesin. Sonymen qatar ákimdikter ınvestıtsııalyq jobalardy iske asyrý úshin qajetti ınfraqurylymnyń ýaqtyly iske qosylýyn qamtamasyz etýge tıis. Jergilikti bıýdjetterdiń qarajatyn belsendi túrde tartý qajet. Qarjy mınıstrligi de basym jobalardy ýaqtyly qarjylandyrýdy qamtamasyz etsin, — degen tapsyrma júktedi Oljas Bektenov Úkimet otyrysynda. 

Odan ári Premer-mınıstr ekinshi deńgeıdegi bankter naqty sektordy qarjylandyrýǵa belsendi qatysýy kerektigin tilge tıek etti. 

— Memleket sýbsıdııalaý, kepildik berý jáne qaıta qarjylandyrý quraldarymen qamtamasyz etýge daıyn. Al, bankter tek saýda nemese tutyný kredıtterin berip qana qoımaı, ónerkásiptik jáne ınfraqurylymdyq jobalarmen de jumys isteýge ázir bolýǵa tıis. Sondaı-aq memlekettik ınstıtýttar men bankter arasyndaǵy tepe-teńdikti qamtamasyz etý kerek. Memlekettik qarjy qurylymdary ekinshi deńgeıdegi bankterdiń qyzmetin qaıtalamaı, olardyń qarjylandyrý isine qatysýy úshin jaǵdaı jasaýy qajet. Jalpy, biz jeke ınvestıtsııa quraldaryn, onyń ishinde korporatıvtik oblıgatsııalar shyǵarýdy jáne memlekettik-jekemenshik áriptestik tetikterin damytýǵa tıispiz. Mınıstrlikter, ákimdikter, kvazımemlekettik sektor men bankter ulttyq ekonomıkanyń sapaly ári qarqyndy ósýi úshin barlyq resýrsty jumyldyrýy qajet, — dep tolyqtyrdy Oljas Bektenov.

Buǵan deıin Úkimet basshysy Oljas Bektenov ekonomıkanyń naqty sektoryn qarjylandyrý salasyndaǵy birqatar problemany kótergen edi

Sondaı-aq Premer-mınıstr ınvestıtsııalyq jobalardy pysyqtaýda memlekettik organdardyń sylbyr ekenin aıtty

Сейчас читают