Oljas Bektenov byltyrǵy qurǵaqshylyq týraly: Zardaptardyń aldyn alýǵa bolatyn edi
ASTANA. KAZINFORM – Premer-mınıstr Oljas Bektenov Úkimet otyrysynda ońtústik óńirlerdegi qurǵaqshylyq tsıkliniń zardabyn ylǵal kóp qajet etpeıtin daqyldardyń alqabyn keńeıtý arqyly azaıtýǵa bolatynyn aıtty.
«Esterińizde shyǵar, ótken jylǵy qolaısyz aýa raıy astyqtyń sapasy men kólemine aıtarlyqtaı kesirin tıgizgen bolatyn. Kóptegen zardaptardyń aldyn alyp, onyń saldaryn barynsha azaıtýǵa bolatyn edi. Qurǵaqshylyqqa tózimdi sorttar bar», - dedi Úkimet basshysy.
Sondaı-aq, ol ákimdikterdiń joǵary jaqqa beretin jalǵan málimetteri saladaǵy problemalardy shıelenistirip jatqanyn atap ótti.
«Egis alqaptarynyń qurylymynan dándi-daqyldardy ártaraptandyrý qarqyny tómen ekenin baıqaýǵa bolady. Ákimdikterdiń tarapynan bul baǵytta belsendi jumys kórinbeıdi. Dıqandar óńirlerdiń naqty josparlary men salalyq mınıstrliktiń mindetterinen beıhabar.
Onyń ústine, eginshilerdiń arasynda sýdy kóp qajet etetin daqyldardyń egis alqaptaryn ádeıi azaıtyp kórsetý faktileri de kezdesedi.
Bul sý tapshylyǵyna baılanysty qalyptasyp otyrǵan kúrdeli ahýaldy odan saıyn qıyndatyp jiberedi», - dedi Premer-mınıstr.
