Oljas Bektenov: Byltyr elge 20 mlrd dollardan astam ınvestıtsııa tartyldy
ASTANA. KAZINFORM — Oljas Bektenov Eni jáne Baker Hughes halyqaralyq kompanııalarynyń basshylyǵymen munaı-gaz salasyndaǵy yntymaqtastyqty talqylady. Bul týraly Úkimettiń baspasóz qyzmeti habarlady.
Qazaqstan Respýblıkasynyń Premer-mınıstri Oljas Bektenov jetekshi halyqaralyq energetıkalyq kompanııalardyń basshylyǵymen, QR Prezıdenti janyndaǵy Sheteldik ınvestorlar keńesiniń 38-shi plenarlyq otyrysyna qatysýshylarmen birqatar ekijaqty kezdesýler ótkizdi. Olardyń ishinde Eni S.p.A-nyń jahan boıynsha tabıǵı resýrstardy barlaý jáne óndirý jónindegi dırektory Lýka Vınıatı men Baker Hughes dırektorlar keńesiniń tóraǵasy ári bas atqarýshy dırektory Lorentso Sımonellı bar.
Oljas Bektenov búgin Qazaqstan Respýblıkasynyń jańa Konstıtýtsııasy kúshine engenin atap ótti. Elimizdiń prezıdenti Qasym-Jomart Toqaevtyń basshylyǵymen ekonomıkanyń turaqty jáne ártaraptandyrylǵan ósýin qamtamasyz etýge baǵyttalǵan ınvestıtsııalyq tsıkl júzege asyrylýda. Byltyr tikeleı sheteldik ınvestıtsııalar aǵyny $20 mlrd-tan asty. Bıyl el ekonomıkasyna $25,5 mlrd-tan astam sheteldik ınvestıtsııa tartý josparlanyp otyr.
Kezdesýler barysynda birlesken ınvestıtsııalyq jobalardyń aǵymdaǵy mártebesi talqylandy, sondaı-aq ekonomıkanyń basym baǵyttaryndaǵy ózara is-qımyldy odan ári damytý perspektıvalary qaraldy.
Eni S.p.A-nyń jahan boıynsha tabıǵı resýrstardy barlaý jáne óndirý jónindegi dırektory Lýka Vınıatımen energetıkalyq ınfraqurylymdy odan ári damytý máselesi qaraldy. Jańaózende jalpy qýaty 247 MVt gıbrıdti elektr stansasynyń qurylysyna erekshe nazar aýdaryldy, ony júzege asyrý qazirgi zamanǵy tómen kómirtekti tehnologııalardy engizýge jáne eldiń energııa júıesiniń turaqtylyǵyn arttyrýǵa yqpal etetin bolady.
Baker Hughes dırektorlar keńesiniń tóraǵasy jáne bas atqarýshy dırektory Lorentso Sımonellımen kezdesýde óndiristi lokalızatsııalaýdy keńeıtý jáne munaı-gaz salasynda zamanaýı tehnologııalyq sheshimderdi engizý máseleleri talqylandy.
Búgingi tańda Qazaqstanda kompanııa qosalqy bólshekterdiń 174 ataýyn óndirýdi lokalızatsııalady, 100-ge jýyq pozıtsııa qazaqstandyq jetkizýshilermen birlesip pysyqtaý satysynda tur, bul rette kompanııanyń servıstik qyzmetteriniń 95%-yn qazaqstandyq bólimsheler men mamandar oryndaıdy. Baker Hughes lokalızatsııany odan ári keńeıtýge, otandyq kásiporyndarmen áriptestikti damytýǵa, ónerkásiptik jabdyqtardy monıtorıngileý úshin tsıfrlyq sheshimderdi engizýge, sondaı-aq gaz óńdeý, zamanaýı óndirister qurý jáne dekarbonızatsııa salasyndaǵy jobalarǵa qatysýǵa nıetti ekendigi atap ótildi.
Kelissózder qorytyndysy boıynsha taraptar ınvestıtsııalyq yntymaqtastyqty odan ári damytýǵa, birlesken jobalardy júzege asyrýǵa jáne munaı-gaz salasyndaǵy tehnologııalyq áriptestikti keńeıtýge ózara múddeliligin rastady.
Aıta ketelik bıyl Qazaqstanǵa 25,5 mlrd dollar sheteldik ınvestıtsııa tartylýy kerek ekeni aıtylǵan edi.
