Oljas Bektenov: Bıyl Qazaqstanda 200-den astam jańa óndiris iske qosylady
ASTANA. KAZINFORM — Oljas Bektenov QR Prezıdenti janyndaǵy Sheteldik ınvestorlar keńesiniń aldaǵy otyrysyna qatysýshylarmen birqatar kezdesý ótkizdi. Bul týraly Úkimettiń baspasóz qyzmeti habarlady.
Qazaqstan Respýblıkasynyń Premer-mınıstri Oljas Bektenov QR Prezıdenti janyndaǵy Sheteldik ınvestorlar keńesiniń 38-shi plenarlyq otyrysyna qatysýshylar: Dúnıejúzilik banktiń Eýropa jáne Ortalyq Azııa óńiri boıynsha vıtse-prezıdenti Antonella Bassanımen, Chevron Upstream Prezıdenti Kleı Neffpen, Shell plc «Barlaý jáne óndirý» bólimshesiniń prezıdenti Pıter Kostellomen birqatar ekijaqty kezdesý ótkizdi.
Kelissózder barysynda birlesken bastamalardyń aǵymdaǵy mártebesi jáne áriptestikti odan ári nyǵaıtý perspektıvalary qaraldy.
Oljas Bektenov kezdesýge qatysýshylardy Qazaqstan Respýblıkasynyń jańa Konstıtýtsııasynyń kúshine engeni týraly habardar etti.
— Memleket basshysy Qasym-Jomart Toqaev Úkimettiń aldyna jańa ekonomıkalyq modelge kóshý mindetin qoıdy. Bıyl elimizde 200-den astam jańa óndiris oryndary ashylmaq. Bul ulttyq ekonomıkanyń odan ári damýyna, jańa jumys oryndaryn qurýǵa, qosylǵan quny joǵary ónim shyǵarýdy ulǵaıtýǵa eleýli serpin bermek. Qazaqstan úkimeti el ekonomıkasy úshin basym baǵyttar boıynsha halyqaralyq ınvestorlarmen uzaq merzimdi jobalardy júzege asyrý maqsatynda turaqty jaǵdaılardy qamtamasyz etýdi jalǵastyrady, — dep atap ótti Premer-mınıstr.
Dúnıejúzilik banktiń Eýropa jáne Ortalyq Azııa óńiri boıynsha vıtse-prezıdenti Antonella Bassanı Qazaqstanda júrgizilip jatqan reformalardy joǵary baǵalap, olardyń elimizdiń odan ári turaqty damýy úshin mańyzdylyǵyn atap ótti.
— Eń aldymen, sizderdi jańa Konstıtýtsııanyń qabyldanýymen quttyqtaımyn. Bul — el úshin shynymen tarıhı sát. Sondaı-aq, JІÓ ósýiniń joǵary qarqynyn jáne halyqtyń ómir súrý deńgeıiniń aıtarlyqtaı artýyn qosa alǵanda, Qazaqstannyń sońǵy jyldardaǵy eleýli ekonomıkalyq nátıjelerin atap ótkim keledi. Bul jetistikter eldi tabysy joǵary memleket mártebesine senimdi túrde jetkizedi. Meniń bilýimshe, bul — Prezıdent belgilegen negizgi maqsattardyń biri, — dedi Dúnıejúzilik banktiń Eýropa jáne Ortalyq Azııa óńiri boıynsha vıtse-prezıdenti.
Kezdesý barysynda 2026-2031 jyldarǵa arnalǵan áriptestiktiń negizdemelik strategııasyn júzege asyrý máseleleri talqylandy. Onyń ishinde jeke sektorǵa jetekshi ról bere otyryp, ekonomıkany damytýdyń neǵurlym ártaraptandyrylǵan, ornyqty jáne básekege qabiletti modeline kóshýdi jedeldetý jónindegi birlesken is-sharalarǵa nazar aýdaryldy.
Sondaı-aq, kópjyldyq yntymaqtastyqtyń mańyzdylyǵy da atap ótildi. Onyń sheńberinde, máselen, Qazaqstanda kólik, bilim berý, tsıfrlandyrý, ekologııa jáne «jasyl» tehnologııalardy damytý salalarynda jalpy somasy $8 mlrd-tan asatyn 50-den astam joba júzege asyryldy.
Antonella Bassanı sonymen qatar Transkaspıı halyqaralyq kólik baǵytyn damytýdaǵy Qazaqstannyń artyp kele jatqan rólin, sondaı-aq elimizdiń tsıfrlyq transformatsııa men JI salasyndaǵy jetistikterin atap ótip, respýblıkada júzege asyrylyp jatqan reformalar basqa memleketter úshin oń úlgi bolyp sanalatynyn atap ótti. Taraptar jeke sektordyń ekonomıkaǵa qatysýyn keńeıtý máselelerine erekshe nazar aýdardy.
Kezdesý barysynda Qazaqstan Prezıdentiniń keńesshisi – Strategııalyq josparlaý jáne reformalar agenttiginiń tóraǵasy Áset Erǵalıev, sondaı-aq ulttyq ekonomıka, qarjy, energetıka, kólik, jasandy ıntellekt jáne tsıfrlyq damý mınıstrlikteriniń basshylyǵy pikir bildirdi. Dúnıejúzilik banktiń delegatsııasy Qazaqstanmen strategııalyq áriptestikti odan ári tereńdetýge, birlesken jobalar men saraptamalyq ózara is-qımyldy keńeıtýge daıyndyǵyn rastady.
Qazaqstan Premer-mınıstri Oljas Bektenov pen Shell plc «Barlaý jáne óndirý» bólimshesiniń prezıdenti Pıter Kostello Qarashyǵanaq pen Soltústik Kaspııdegi jobalardy júzege asyrýdyń ózekti máselelerin, geologııalyq barlaý salasyndaǵy yntymaqtastyqtyń perspektıvalaryn talqylady. Kompanııanyń Qazaqstanda jańa jobalardy júzege asyrýǵa degen qyzyǵýshylyǵy atap ótildi.
Chevron Upstream prezıdenti Kleı Neffpen kezdesýde strategııalyq seriktestikti odan ári damytý perspektıvalary qarastyryldy. Teńiz jáne Qarashyǵanaq jobalaryna, jańa óndiristik nysandardy turaqty paıdalanýdy qamtamasyz etýge, geologııalyq barlaý salasyndaǵy yntymaqtastyq perspektıvalaryna nazar aýdaryldy. Jumystar men qyzmetterdegi, sondaı-aq munaı-gaz salasy úshin bilikti jergilikti kadrlardy daıarlaý júıesindegi qazaqstandyq qamtý úlesin arttyrýdyń mańyzdylyǵy atap ótildi.
Kezdesýler qorytyndysy boıynsha ınvestıtsııalyq yntymaqtastyqty nyǵaıtýǵa ózara múddelilik rastaldy.
Aıta ketelik Oljas Bektenov Eni jáne Baker Hughes halyqaralyq kompanııalarynyń basshylyǵymen munaı-gaz salasyndaǵy yntymaqtastyqty talqylaǵan edi.
