Oljas Bektenov balalardyń energetıkalyq sýsynǵa qumartýyn qaýipti dep baǵalady
ASTANA. KAZINFORM — Premer-mınıstr Oljas Bektenov búgin Úkimet otyrysynda balalardyń energetıkalyq sýsynǵa qumartýyn qaýipti jaǵdaı dep baǵalady.
- Óte mańyzdy másele – ol balalardyń ishetin tamaǵy. Bizde ókinishke qaraı, balalardyń, jasóspirimderdiń kóbisi fastfýdqa, sodan keıin energetıkalyq sýsyndarǵa qumar bolady.
Tipti, keı kezde oǵan táýeldi bolyp qalady. Osy qaýipke bárimiz, búkil el bolyp, qoǵam bolyp toıtarys berýimiz qajet. Óte qaýipti jaǵdaı. Usynys engizińizder, - dedi Úkimet basshysy Densaýlyq saqtaý mınıstri Aqmaral Álnazarovaǵa qarata.
Mınıstrdiń dereginshe, 2024 jyly Densaýlyq saqtaý kodeksine elektrondyq temeki men veıp aınalymyna tolyq tyıym salý jónindegi norma engizildi, sondaı-aq tyıym salýdy buzǵany úshin qylmystyq jaýapkershilik kózdeldi.
- 2025 jylǵy 1 qańtardan bastap 21 jasqa tolmaǵan adamdarǵa energetıkalyq sýsyndardy satýǵa tyıym salyndy. Qabyldanyp jatqan sharalar kesheni 2025 jyly Qazaqstanǵa juqpaly emes aýrýlardan bolatyn mezgilsiz ólimdi 25 paıyzǵa qysqartýǵa, DDU-nyń Eýropalyq óńirindegi osy maqsatqa jetken 9 eldiń qataryna qosylýǵa múmkindik berdi. Qazaqstan Ortalyq Azııada osy maqsatqa jetken birinshi el bolyp tanyldy, - dedi Aqmaral Álnazarova.
Aıta keteıik, búgin Úkimet «Qazaqstan balalary» tujyrymdamasyn pysyqtady.