Oljas Bektenov «Azııa Avtodan» qaıtarylǵan múlikti kim ıelenetinin aıtty

ASTANA. KAZINFORM – Premer-mınıstr Oljas Bektenov Májilis depýtattarynyń saýalyna bergen jaýapta «Azııa Avto» kompanııasynyń Óskemendegi buǵattalǵan múlki kimge beriletinin aıtty.

- «Azııa Avto» aktsıonerlik qoǵamynyń barlyq múlkine tyıym salyndy, sot úkimi men sheshimderi oryndalýda. Shyǵys Qazaqstan oblysy ádilet departamentiniń memlekettik sot oryndaýshylarynda 30 atqarýshylyq is qarastyrylýda.

«Azııa Avto Qazaqstan» AQ qurylysy aıaqtalmaǵan zaýytyna, jer ýchaskelerine, ǵımarattarǵa, qurylystarǵa jáne taýar-materıaldyq qundylyqtarǵa kelsek, olardy memlekettik múlikti basqarý jónindegi ýákiletti organǵa berý boıynsha sharalar júrgizilýde, - dep jazady Premer-mınıstr.

Biraq bul kompanııanyń múlki memleket menshiginde qalady degen sóz emes.

- Belgilengen talaptarǵa sáıkes «Azııa Avto Qazaqstan» AQ zaýyty qurylysy aıaqtalmaǵan nysan bolyp tabylatyndyqtan memlekettik zańdy tulǵalardyń balansyna berilmeıdi. Óz kezeginde, otandyq jáne sheteldik kompanııalardyń bul qurylysy aıaqtalmaǵan zaýyttyń alańyna óz jobalaryn ornalastyrý múmkindigin qarastyryp, ınvestıtsııalyq qyzyǵýshylyq tanytatyny aıtylady. Bul atalǵan nysandy Shyǵys Qazaqstan oblysynyń ónerkásiptik damýyna tartýǵa múmkindik beredi. Osyǵan baılanysty atalǵan óndiristik aktıvterdi odan ári paıdalaný jáne ınvestor tartý máselesi sot oryndaýshylyq isi aıaqtalǵannan jáne múlik memleketke berilgennen keıin qarastyrylady, - deıdi Oljas Bektenov.

Esik salsaq, «Azııa Avto» kompanııasynyń burynǵy basshysy Anatolıı Balýshkın sot úkimimen syrttaı 9 jylǵa bas bostandyǵynan aıyrylǵan bolatyn.

Al jeltoqsan aıynda Májiliste «Azııa Avto» kompanııasynyń óndiristik qýatyn aýyl sharýashylyǵy tehnıkasyn shyǵarýǵa baǵyttaý týraly usynys kóterilgen edi.