Oljas Bektenov avtobólshek óndirisiniń josparyn bir aıda ázirleýdi tapsyrdy
ASTANA. KAZINFORM — Premer-mınıstr Oljas Bektenov Ónerkásip mınıstrligine bir aıda Qazaqstanda avtobólshekter óndirisin damytý jónindegi naqty jospardy ázirleýdi tapsyrdy.
Premerdiń aıtýynsha, mashına jasaý salasy — ekonomıkany órkendetýge jáne ony is júzinde ártaraptandyrýǵa yqpal etetin asa mańyzdy baǵyttardyń biri. Memleket basshysy otandyq avtomobıl ónerkásibin tolyqqandy joǵary tehnologııalyq salaǵa transformatsııalaý mindetin qoıdy.
— Elimizde zamanaýı talaptarǵa saı keletin avtobólshekterdiń jergilikti óndirisin jolǵa qoıý — óte mańyzdy baǵyt. Ol úshin qosalqy bólshekter óndirisinde qoldanylatyn otandyq materıaldardyń túrlerin keńeıtý qajet. Máselen, Qaraǵandy oblysyndaǵy «Qarmet» kompanııasy avtobýstar men júk kólikteri úshin arnaıy bolat markalaryn shyǵaryp jatyr. Kelesi kezeńde jeńil avtomobılderge arnalǵan bolat óndirisin qolǵa alý qajet, — dedi Oljas Bektenov.
Sonymen birge, mys, alıýmınıı, hromdy tereń óńdeý, rezeńke, plastık, kabel jáne basqa da ónim túrlerin damytý salasynda da úlken áleýet bar.
— Osyǵan baılanysty Ónerkásip mınıstrligine salalyq kásiporyndarmen birlesip, bir aı ishinde avtobólshekter óndirisin qurý boıynsha tıisti jospardy ázirleýdi tapsyramyn, — dedi Oljas Bektenov.
Aıta keteıik, bıyl elimizde 190 myń avtokólik shyǵarylady.
Qazaqstannyń 19 oqý ornynda avtoónerkásip mamandary daıarlanyp jatyr.
