Oljas Bektenov avıaotyn naryǵyn damytý máseleleri boıynsha keńes ótkizdi
ACTANA. KAZINFORM — Premer-mınıstr Oljas Bektenov Memleket basshysynyń avıaotyn naryǵyn damytýǵa qatysty tapsyrmalaryn júzege asyrý máseleleri jóninde jıyn ótkizdi. Bul týraly Úkimettiń baspasóz qyzmeti habarlady.
Básekelestikti qorǵaý jáne damytý agenttiginiń tóraǵasy Marat Omarov avıaotynǵa baǵa belgileý tetigin jetildirý: atap aıtqanda, avıaotyndy kóterme jáne bólshek saýda, onyń ishinde áýejaılar arqyly ótkizý tásilderin usyndy.
Importty almastyrýǵa nazar aýdaryldy. Búginde «QazMunaıGaz» UK» tobynyń óndirisi otandyq áýe kompanııalar men memlekettik avıatsııanyń avıaotynǵa degen qajettiligin qamtamasyz etip otyr. «QazMunaıGaz» UK» derekterine súıensek, 2031 jylǵa qaraı «PetroQazaqstan Oıl Prodakts» JShS-niń keńeıtý nátıjesinde avıaotyn óndirý kólemi 1,5 mln tonnaǵa deıin artady.
Sonymen qatar áýejaılardy qarjylandyrý qurylymyn ózgertý perspektıvalary talqylandy. Infraqurylymǵa qol jetkizýdiń servıstik modelin engizý olardyń avıaotynnan baqylaýǵa alynbaǵan tabystarǵa táýeldiligin tómendetedi, sondaı-aq áýejaı qyzmetteri salasynyń damýyna serpin beredi. Osy baǵytta áýejaı ınfraqurylymyn jańǵyrtýdy yntalandyrý úshin kelisilgen ınvestıtsııalyq jobalary bar áýejaılarǵa birjolǵy keıinge qaldyrýdy usyna otyryp, Prezıdenttiń «Ekonomıkany yryqtandyrý jónindegi sharalary týraly» Jarlyǵyn oryndaý sheńberinde ázirlengen Negizgi qýatqa qol jetkizý qaǵıdalaryn iske asyrý múmkindigi qaraldy.
Energetıka mınıstri Erlan Aqkenjenov, kólik mınıstri Marat Qarabaev, «QazMunaıGaz» UK» AQ basqarma tóraǵasynyń orynbasary Áset Maǵaýovtyń jáne basqa da ókilderdiń usynystary tyńdaldy.
Keńes qorytyndysy boıynsha Premer-mınıstr birqatar tapsyrma berdi.