Oljas Bektenov: Aýyldar men shaǵyn qalalardaǵy jobalarǵa basymdyq berińizder
ASTANA. KAZINFORM – Premer-mınıstr Oljas Bektenov Úkimet otyrysynda qolóner, bylǵary, sút óńdeýmen aınalysatyn kásipkerlerdi qoldaýdy tapsyrdy
- Memleket basshysy «Altyn sapa» jáne «Paryz» syılyqtarynyń laýreattaryn marapattaý rásiminde shaǵyn bıznesti qoldaýdyń biryńǵaı baǵdarlamalyq qujatyn qabyldaýdy tapsyrdy. Ol iskerlik belsendilikke jáne shaǵyn kásipkerlikti damytýǵa qosymsha serpin berýge tıis. Ulttyq ekonomıka mınıstrligi memlekettik organdarmen jáne «Atameken» ulttyq palatasymen birlesip, qujattyń sapaly ázirlenýin qamtamasyz etsin, - dedi Úkimet basshysy.
Sondaı-aq, ol ákimderge shaǵyn jáne orta bıznesti qoldaýdyń basym baǵyttaryn qaıtar qaraýdy tapsyrdy.
- Jergilikti óndiris pen shıkizatty qaıta óńdeýdi yntalandyrý, qolóner, bylǵary, sút ónimderi jáne basqa da salalardy keńeıtý sharalaryn qamtyǵan jón.
Ol úshin ákimdikter óńirdiń áleýeti men qajettilikterin negizge ala otyryp, basym baǵyttardyń tizbesin aıqyndaýy qajet.
Atalǵan sharalardy iske asyrý kásipkerlerge tikeleı qoldaý kórsetýge, halyqty jumyspen qamtý deńgeıin arttyrýǵa jáne shaǵyn bıznestiń turaqtylyǵyn nyǵaıtýǵa múmkindik beredi. Bul oraıda, ásirese aýyldyq jerler men shaǵyn qalalardaǵy jobalarǵa basa kóńil bólý kerek, - dedi Oljas Bektenov.
Aıta keteıik, búgin Úkimette 11 aıdyń áleýmettik-ekonomıkalyq damý qorytyndysy qaralyp jatyr.