Oljas Bektenov Astanadaǵy Ázerbaıjan elshiliginiń kóńil aıtý kitabyna jazba qaldyrdy
ASTANA. KAZINFORM – Qazaqstan Premer-mınıstri Oljas Bektenov Ázerbaıjannyń Astanadaǵy elshiligine baryp, Aqtaý qalasynyń áýejaıy mańynda bolǵan Az Airlines áýe kompanııasyna tıesili Embraer 190 ushaǵynyń apatyna baılanysty ashylǵan kóńil aıtý kitabyna jazba qaldyrdy. Bul týraly Úkimettiń baspasóz qyzmeti habarlady.
26 jeltoqsanda Ázerbaıjanda qaraly kún jarııalandy. Qaza tapqandardy bir mınýt únsizdikpen eske aldy.
- Bul qıyn sátte Qazaqstan Úkimetiniń jáne óz atymnan qaza tapqandardyń otbasylaryna, týystary men jaqyndaryna qaıǵyryp kóńil aıtamyn. Orny tolmas aýyr qaıǵyǵa ortaqtasyp, apat saldarynan zardap shekkenderdiń tezirek saýyǵyp ketýin, ázerbaıjan halqyna sabyr men tózimdilik tileımin. Biz baýyrlas Ázerbaıjanǵa tıisti kómek qolyn sozyp, jan-jaqty qoldaý kórsetemiz, — dep jazdy Oljas Bektenov.
Buǵan deıin Premer-mınıstr qaza tapqan qazaqstandyqtardyń týǵan-týystaryna kóńil aıtyp, zardap shekken Ázerbaıjan, Reseı jáne Qyrǵyzstan azamattaryna jan-jaqty qoldaý kórsetýdi tapsyrǵan bolatyn.
Aqtaý qalasyna kelgen qaza tapqan jolaýshylardyń otbasy múshelerine qajetti kómek kórsetilip jatyr.
Premer-mınıstr avıatsııalyq qaýipsizdikti kúsheıtý jóninde birqatar tapsyrma bergenin jazǵan bolatynbyz.