Oljas Bektenov Almatynyń elektrondy kommertsııa ınfraqurylymymen tanysty
ASTANA. KAZINFORM — Oljas Bektenov Almatynyń áleýmettik-ekonomıkalyq damýymen, qonaq úı bıznesi jáne elektrondy kommertsııa ınfraqurylymymen tanysty. Bul týraly Úkimettiń baspasóz qyzmeti málim etti.
Premer-mınıstr Oljas Bektenovke Almatyǵa jumys sapary aıasynda Memleket basshysynyń tapsyrmalarynyń oryndalý barysy jáne qala damýynyń negizgi áleýmettik-ekonomıkalyq kórsetkishteri týraly baıandaldy. Sondaı-aq ınvestıtsııa tartý jáne jańa jumys oryndaryn ashýda bolashaǵy zor baǵyttardyń biri retinde elektrondy kommertsııa men týrızmdi damytýǵa nazar aýdaryldy.
Jumys sapary barysynda Premer-mınıstr osy jyldyń І toqsanyndaǵy negizgi kórsetkishter boıynsha aqparat tyńdady. Almaty qalasy ákiminiń orynbasary Álisher Ábdiqadyrov qysqamerzimdi ekonomıkalyq ındıkatordy 9,1%-ǵa deıin jedeldetý týraly baıandady. Ekonomıka ósiminiń negizgi draıverleri – kólik (+23,9%), qurylys (+21,3%) jáne óńdeý ónerkásibi (+17,6%) sııaqty salalar. Bıylǵy sáýir aıynda Almatyda 57,9% ındeksimen respýblıkadaǵy eń joǵary iskerlik belsendilik tirkeldi. Ekonomıkanyń qarqyndy damýy jergilikti bıýdjet kiristeriniń 14,6%-ǵa ósýin qamtamasyz etti. Qala ınvestıtsııa kólemi boıynsha respýblıkada jetekshi orynǵa ıe. Osy jyldyń 4 aıynda negizgi kapıtalǵa 541,3 mlrd teńge ınvestıtsııa tartylyp, 35,6% ósti.
Shaǵyn jáne orta bıznes qala ekonomıkasynda mańyzdy ról atqarady. Ótken jyldyń qorytyndysy boıynsha jalpy óńirlik ónimdegi ShOB úlesi 60,3%-ǵa deıin artty. Sektor qaladaǵy jumyspen qamtylǵandar sanynyń 90%-yn nemese 972,1 myń adamdy jumys oryndarymen qamtamasyz etip otyr. Sonymen qatar Almatyda elektrondy kommertsııanyń keńinen damýy kásipkerlerge jańa naryqtarǵa shyǵýǵa jáne ónimder men qyzmetterdi tıimdi satýǵa qosymsha múmkindikter ashady. Búginde qalanyń úlesine elimizdegi taýarlardyń elektrondy bólshek saýdasy kóleminiń 95,2%-y jáne qyzmetterdiń elektrondy saýdasynyń 93,2%-y tıesili.
Almatyda tuńǵysh «Magnum E-commerce Kazakhstan» JShS mamandandyrylǵan Dark Store formatyndaǵy zamanaýı qoımasyna barǵan Oljas Bektenov rıteıl salasyndaǵy jańa ınfraqurylymmen tanysty. Hab logıstıkany jedeldetedi, tutynýshylarǵa qyzmet kórsetý sapasyn arttyra otyryp, táýligine 18 myńǵa deıin tapsyrysty tıimdi óńdeýge qabiletti.
Investıtsııalyq jobaǵa 13 mlrd teńge salyndy, 800 jumys orny ashyldy. Jalpy, ótken jyly elimizdegi elektrondy saýda kólemi sońǵy 5 jylda 5 esege ósip, 3,2 trln teńgege jetti. e-commerce úlesi bólshek saýdanyń jalpy kóleminiń 16,6%-yn qurady.
Premer-mınıstr tutynýdyń, logıstıka men saýdanyń zamanaýı modelin qalyptastyrýdyń mańyzdylyǵyn atap ótti. 2017 jyldan beri kóleńkeli ekonomıkanyń 7,5%-ǵa qysqarýy mańyzdy nátıje bolyp otyr. Úkimet saýda men tranzıtti belsendi damytý úshin ınfraqurylym qurýda barynsha qajetti qoldaý kórsetedi. Otandyq óndirýshilerdi qoldaýǵa basa nazar aýdarylýda. Ákimdik pen Saýda mınıstrligine rıteıler men qazaqstandyq kompanııalardyń yntymaqtastyǵyn qurý tapsyryldy.
Kaspi.kz ınnovatsııalyq qazaqstandyq kompanııasynyń basshysy jáne teń quryltaıshysy Mıhaıl Lomtadze 2025 jyldyń ózinde Kaspi.kz platformasyndaǵy Magnum onlaın sýpermarketi arqyly 800 myńnan astam qazaqstandyq 5,3 mln jyldam jetkizý onlaın tapsyrysyn bergenin aıtty. Satylymdardyń 50%-dan astamy otandyq ónim. Sonymen qatar 4,5 myń jumys orny qurylǵan. Kaspi.kz platformasyndaǵy Magnum onlaın sýpermarketi memleket bıýdjetine 5 mlrd teńge kóleminde salyq aýdarǵan, onyń jartysy nemese shamamen 2,4 mlrd teńgesi 2024 jyly tólengen.
Almaty Qazaqstandaǵy týrızmdi damytýdyń negizgi ortalyǵy. Salaǵa bıyl 1,5 ese ósimmen 40,2 mlrd teńge ınvestıtsııa tartyldy. 2025 jyldyń qorytyndysy boıynsha demalýshylar aǵyny 2,5 mln adam deńgeıinde boljanady (2024 jyly 2,3 mln-nan astam). Jyl saıynǵy dınamıkany eskere otyryp, qonaq úılerge júkteme artyp keledi. Suranystyń eń joǵary kezeńinde qoldanystaǵy qonaqúılerdiń tolý deńgeıi 90%-dan asady. Osyǵan baılanysty tıisti ınfraqurylymdy qurý mańyzdy bolyp sanalady.
Oljas Bektenov týrıstik ınfraqurylymdy damytýǵa baǵyttalǵan qonaq úı qoryn keńeıtý josparlarymen tanysty. Atap aıtqanda, mysal retinde «Renion City Hotel» jumysy kórsetildi jáne «Hilton Park Almaty 5*», «Hilton Garden Inn 4*», «Radisson Hotel & Residences Almaty 4*» jáne «The Veil» jańa qonaq úıleriniń qurylys jobalary zertteldi. 2027 jylǵa qaraı bólmeler sanyn 1,5 esege arttyrý jospary jasaldy. Osylaısha, týrıster aǵynyn retteý, jańa jumys oryndaryn ashý boıynsha oń nátıjege qol jetkiziledi, bul jalpy qala ekonomıkasyn ártaraptandyrýǵa qosymsha serpin beredi.
Premer-mınıstr ákimdik pen memlekettik organdarǵa nysandardy ýaqtyly paıdalanýǵa berý úshin qajetti qoldaý sharalaryn kórsetýdi tapsyrdy. Sonymen qatar ınvestorlarǵa týrızm salasyndaǵy álemdik standarttarǵa jergilikti mamandardy tartý jáne oqytý boıynsha talaptar qoıyldy.
Aıta keteıik, Oljas Bektenov jumys sapary barysynda Almaty taý klasterin odan ári damytý tásilderimen tanysty.