Oljas Bektenov Almaty oblysyndaǵy Qonaev jáne Alataý qalalaryn damytý josparyn tyńdady
ALMATY. KAZINFORM – Qazaqstan Premer-Mınıstri Oljas Bektenov Almaty oblysyna jumys sapary barysynda bıyl oryndalýy tıis negizgi mindettermen jáne Qonaev qalasyn damytý jónindegi uzaq merzimdi josparmen tanysty. Úkimet basshysy sondaı-aq Arnaıy ekonomıkalyq aımaq aýmaǵynda iri jobalardy iske asyrý máselesi boıynsha Alataý ákiminiń baıandamasyn tyńdady.
Prezıdent Qasym-Jomart Toqaevtyń tapsyrmasyna sáıkes Qonaevtyń damýy joǵary ekologııalyq, «aqyldy» qala tujyrymdamasyna sáıkes kelýge tıis. Úkimet bekitken Keshendi damý josparynda 2023-2027 jyldar aralyǵynda 187 is-sharany júzege asyrý kózdelgen. Qalany abattandyrý, kólik jáne ınjenerlik ınfraqurylymmen qamtamasyz etý, áleýmettik nysandardy salý jónindegi jobalardy iske asyrýǵa memlekettik bıýdjetten de, jeke sektor tarapynan da aıtarlyqtaı qoldaý kórsetiledi.
Almaty oblysynyń ákimi Marat Sultanǵazıev baıandaǵandaı, Qonaev qalasynda abattandyrý jumystary belsendi júrgizilýde. 2023 jyldyń qorytyndysy boıynsha 106 km ınjenerlik ınfraqurylym, onyń ishinde 19 km avtojol, 61 km elektr berý jelileri, 26 km sýmen jabdyqtaý jáne sý burý jelileri jóndeldi. Turǵyn úı oramdary qarqyndy damyp keledi – 610 páterlik 10 úı salyndy, 2023 jyly 15 úıdiń qurylysy bastaldy, 2024 jyly 32 úı bastalady dep josparlanýda. Barlyǵy – 1400 páterlik 47 úı. Qazirgi ýaqytta 13 ınvestıtsııalyq joba júzege asyrylyp jatyr. Jalpy pýl jobasynda 5 myń jumys ornyn ashýmen, kapıtal salymdarynyń barlyq kólemi 470 mlrd teńge bolatyn 23 perspektıvalyq usynys bar.
Bıyl halyqtyń ósip kele jatqan qajettilikterin eskere otyryp, abattandyrý boıynsha aýqymdy jumystar josparlanǵan. Olardyń ishinde «Almaty-Óskemen» tas joly qurylysynyń tehnıkalyq-ekonomıkalyq negizdemesin ázirleý, «Jańa Іle» jańa shaǵyn aýdanynda kóshe-joldary jelisin tartý, jańa turǵyn alaptarǵa kommýnıkatsııalar júrgizý jumystary bar. Aldaǵy 5 jylda qalada oqýshy oryndarynyń, zamanaýı medıtsınalyq mekemelerdiń, mádenı jáne sport nysandarynyń tapshylyǵy problemalaryn sheshý kózdelgen. Máselen, Qonaevta kitaphanasy bar 600 orynǵa arnalǵan Oqýshylar saraıy, Sport saraıy, drama teatry salynady. Onkologııalyq jáne perınataldyq bloktary bar kópsalaly aýrýhana, aýysymda 500 adam qabyldaıtyn emhana, 200 tósek-oryndy ınfektsııalyq aýrýhana paıdalanýǵa beriledi. Freedom finance týrıstik salany damytý úshin ınvestor retinde áreket etti: bank jańa ornalastyrý obektilerin, qonaq úı keshenderin salý boıynsha 6 ınvestıtsııalyq jobany júrgizedi. Jalpy, Keshendi jospar joǵary sapa standarttaryna sáıkes jańa oblys ortalyǵyn damytýdy jedeldetýge múmkindik beredi.
Úkimet basshysy Alataý qalasynyń jobasymen tanysyp, ákim Árken Ótenovtiń Arnaıy ekonomıkalyq aımaqty damytý perspektıvasy týraly baıandamasyn tyńdady. AEA aýmaǵynda 96,6 myń gektarda jalpy somasy 383 mlrd teńgege 11 iri ınvestıtsııalyq jobany iske asyrý josparlanýda, bul 7 myń jumys ornyn ashýǵa múmkindik beredi.
Oljas Bektenov qala ákimshiligine áleýmettik, ınjenerlik jáne turǵyn úı jobalaryn sapaly iske asyrýda jaýapkershiliktiń salmaǵy aýyr bolatynyn atap ótti. Úkimettiń qaýlysymen Alataý qalasynyń Bas jospary bekitildi, oǵan sáıkes jobalaý sheńberinde qurylystyń bıiktigi – qalanyń ortalyq bóliginen onyń shekarasyna qaraı tómendetý jolymen qalyptastyrý qaǵıdaty kózdelgen.
«Nátıjesinde, biz Almatynyń mańynda týrıstik áleýetti belsendi arttyra otyryp, ónerkásiptik, bilim berý jáne logıstıkalyq ortalyqqa aınalatyn iri megapolıs qurýdy qamtamasyz etýimiz kerek. Bas jospardyń árbir tarmaǵynyń iske asyrylýyn baqylaýda ustaý, sondaı-aq birinshi kezektegi iri jobalardy ruqsat qujattamasymen qamtamasyz etý úshin qala aýmaqtarynyń egjeı-tegjeıli josparlaý jobalaryn ázirleýdi jedeldetý qajet», - atap kórsetti Oljas Bektenov.
