Oljas Bektenov: Alatau City-di Úkimetke tikeleı baǵynyshty etý múmkin emes

ASTANA. KAZINFORM – Premer-mınıstr Oljas Bektenov Májilis depýtatynyń saýalyna joldaǵan jaýapta Prezıdent Qasym-Jomart Toqaevtyń Alatau qalasyna aıryqsha mártebe berý týraly tapsyrmasyn oryndaý múmkin emes ekenin aıtty.

- Qazirgi kezeńde qoldanystaǵy zańnama sheńberinde qalanyń Úkimetke tikeleı baǵyný múmkindigi joq. Osyǵan baılanysty Jarlyqtyń sheńberinde strategııalyq sheshimder qabyldaıtyn Alataý qalasyn damytý máselesi boıynsha keńes jáne operatsııalyq qyzmetke jaýapty «Alatau City Authority» memlekettik qoryn qurý kózdelgen, - dep jazady Úkimet basshysy.

Degenmen keleshekte Alataý qalasynyń arnaıy mártebesi boıynsha zań aktisin ázirleý josparlanǵan. Oljas Bektenovtiń aıtýynsha, bul akt shara tsıfrlyq aktıv aınalymyn retteý, halyqaralyq standarttar boıynsha qurylys júrgizý, tehnologııalyq ınnovatsııalardy, jasandy ıntellektini engizý máselelerin qamtyp, «Alatau» arnaıy ekonomıkalyq aımaǵynyń qyzmetin retteý kerek.

- Alataý qalasy qurylǵannan beri memleket muqtajy úshin 593 gektarǵa jýyq jer ýchaskesi alynǵanyn, jyl sońyna deıin taǵy 2,4 myń gektarǵa jýyq jer ýchaskesin alý josparlanyp otyrǵanyn atap ótemin, - dep jazylǵan jaýapta.

Eske salsaq, Prezıdent Qasym-Jomart Toqaev bıylǵy Joldaýynda Alataý qalasyn Úkimetke tikeleı baǵynatyndaı mártebe berýdi tapsyrǵan bolatyn.