Oljas Bektenov Aqtóbe oblysyndaǵy zaýyttar men júndi tereń óńdeıtin kásiporynǵa bardy
ASTANA. KAZINFORM — Aqtóbe oblysynda Premer-mınıstr Oljas Bektenov Qazaqstandyq munaı jabdyqtary zaýyty men júndi tereń óńdeıtin KazFeltec kásipornyn mysal ete otyryp, Memleket basshysy Qasym-Jomart Toqaevtyń óńdeý ónerkásibin damytý jónindegi tapsyrmalarynyń oryndalý barysymen tanysty.
Otandyq óndiristi keńeıtýge, qosylǵan quny joǵary ónim úlesin arttyrýǵa nazar aýdaryldy.
Óńirdegi ınvestıtsııalyq jobalardy júzege asyrý týraly Aqtóbe oblysy ákiminiń orynbasary Abzal Ábdikárimov baıandady. 10 aıda negizgi kapıtalǵa salynǵan ınvestıtsııalar 1 trln teńgeden asyp, 8,2%-ǵa ósti. Tikeleı sheteldik ınvestıtsııalar eki esege – $357,2 mln-ǵa deıin ósti. Óńirde energetıka, mashına jasaý, tamaq ónerkásibi jáne taǵy da basqa salalardaǵy jobalar júzege asyrylyp jatyr. Sondaı-aq 400 mlrd teńge ınvestıtsııa tartýǵa jáne 1,5 myńnan astam jumys ornyn qurýǵa múmkindik beretin arnaıy ekonomıkalyq aımaq qurý pysyqtalyp jatyr.
Aqtóbe qalasynda Premer-mınıstr «Qazaqstandyq munaı jabdyqtary zaýyty» JShS-nyń óndiristik tsehtaryn aralap kórdi. Kásiporyndy damytýǵa 7,4 mlrd teńge ınvestıtsııalanǵan. Jylyna 100-120 myń tonna ónim óndiretin zaýyt sorǵy-kompressorlyq jáne shegendeý qubyrlaryn, burqaq armatýrasyn, ysyrmalar, jylý almastyrǵyshtar jáne basqa da munaı-gaz jabdyqtaryn shyǵarady. Osy jyldyń toǵyz aıynda shegendeý qubyrlaryn shyǵarý 31,4%-ǵa, ıaǵnı 14,1 myń tonnaǵa, basqa da munaı kásipshiligi jabdyqtaryn shyǵarý 7,4 myń tonnaǵa deıin ósti (2025 jyldyń uqsas kezeńinde – 179 tonna). Ónimder ishki naryqqa baǵyttalǵan jáne ımportty almastyrýǵa yqpal etedi.
Úkimet jetekshisine orta jáne joǵary qysymdy klapandar men ysyrmalar shyǵaratyn tórtinshi tseh salý qarastyrylǵan óndiristi keńeıtý jónindegi josparlar týraly baıandaldy. Investıtsııa kólemi – 700 mln teńge, iske qosý 2027 jylǵa josparlanǵan. Odan bólek, 2 mlrd teńge ınvestıtsııa kózdelgen quıý ádisimen metall daıyndamalar men bólshekter óndirý zaýytynyń jobasy pysyqtalyp jatyr.
Oljas Bektenov sondaı-aq «KazFeltec» JShS-nyń júndi tereń óńdeý jáne toqyma emes materıaldar óndirisiniń tehnologııalyq protsesimen tanysty. Zaýyt dırektory Erlan Jańabergenov joba 2025 jyly jeke ınvestıtsııalar men Ónerkásipti damytý qorynyń qoldaý esebinen júzege asyrylǵanyn baıandady. Salynǵan qarajattyń jalpy kólemi 5,3 mlrd teńge bolǵan. Kásiporynda 2,2 myń tonnaǵa deıin daıyn ónim shyǵarý úshin jylyna 3,6 myń tonnaǵa deıin jún óńdeýge múmkindik beretin ıtalııalyq CORMATEX kompanııasynyń jabdyǵy ornatylǵan. 50 jumys orny quryldy.
Zaýyt qurylysta, jıhaz jasaý jáne taǵy da basqa salalarda qoldanylatyn tabıǵı qoı júninen jasalǵan jylý jáne dybys oqshaýlaǵysh materıaldar shyǵarady. Búginde kásiporyn shıkizatty Aqtóbe, Atyraý, Batys Qazaqstan jáne Jambyl oblystarynyń sharýa qojalyqtarynan satyp alyp otyr, bul aýyl turǵyndaryna ónimin ótkizetinine kepildik berip, tabyspen qamtamasyz etedi. Qazirgi ýaqytta ónim ishki naryqta satylýda, bolashaqta eksportqa shyǵý qarastyrylǵan.
Premer-mınıstr Oljas Bektenov Aqtóbe oblysynyń ákimdigine salalyq memlekettik organdarmen birlesip, otandyq óndiristi keńeıtýge, shıkizatty qaıta óńdeýdi tereńdetýge jáne jańa jumys oryndaryn qurýǵa baǵyttalǵan ınvestıtsııalyq jobalardyń ýaqytyly júzege asyrylýyn qamtamasyz etýdi, ınvestorlarǵa qajetti járdem kórsetýdi jáne óndiristik qýattardy iske qosý merzimderin saqtaýdy tapsyrdy.
Jalpy, Ónerkásip jáne qurylys mınıstrliginiń derekteri boıynsha óńdeý ónerkásibin damytý jańa óndiristerdi iske qosý jáne otandyq ónim nomenklatýrasyn keńeıtýmen qatar júrip jatyr. Osy jyldyń 10 aıynda óndiris kólemi 9,3% ósti. Jyl basynan beri 900 mlrd teńgege 125 joba iske qosyldy. Shıkizatty qaıta óńdeýdi tereńdetýge, avtomobıl jáne temirjol mashınalaryn jasaýdy damytýǵa, sondaı-aq salalyq klasterlerdi qalyptastyrýǵa erekshe nazar aýdarylady.
Bektenov «Bolashaq» shahtasyndaǵy ónerkásiptik qaýipsizdik sharalaryn teksergenin jazǵan edik.