Oljas Bektenov Aqmola oblysyndaǵy qus fabrıkasynyń óndiristik protsesimen tanysty
KÓKShETAÝ. KAZINFORM – Jumys sapary barysynda Premer-Mınıstr Bulandy aýdanyndaǵy Makınsk qus fabrıkasynyń óndiristik protsesimen, sondaı-aq qýattylyqty odan ári arttyrý josparlarymen tanysty, dep habarlady Úkimettiń baspasóz qyzmeti.
Osy jyldyń basynan beri qus fabrıkasy 18,6 mlrd teńgege 18,7 myń tonna et óndirdi. Tsehtardy aralaý kezinde álemdik óndirýshilerdiń jabdyqtaryn qoldana otyryp, ınkýbatsııalaý, ósirý, soıý jáne qaldyqtardy qaıta óńdeý salasyndaǵy zamanaýı tehnologııalarǵa nazar aýdaryldy. Makınsk qus fabrıkasy qus etin ishki naryqqa turaqty túrde jetkizip otyrýǵa múmkindik beredi, sondaı-aq ónimdi Qyrǵyzstan, Ózbekstan men Reseıge eksporttaıdy.
«Úkimet Memleket basshysynyń alǵa qoıǵan AÓK-tegi qaıta óńdelgen ónimniń úlesin ulǵaıtý jáne ony 70%-ǵa deıin jetkizý jónindegi mindeti aıasynda jumys istep jatyr. Tereń óńdeýdi damytý, jumys istep turǵan óndiris oryndaryn qoldaý jáne jańa kásiporyndar ashýǵa jaǵdaı jasaý máselelerine basymdyq beriledi. Otandyq ónimder bizdiń naryq suranysyn qanaǵattandyryp qana qoımaı, shetelde de laıyqty básekege túse alýy kerek. Jańa tehnologııalardy ıntegratsııalaý mańyzdy, bul ónimdilikti arttyryp, sapaǵa tikeleı áser etedi», — degen Oljas Bektenov bul úshin memleket tarapynan qajetti qoldaý kórsetiletinin basa aıtty.
Búgingi tańda Makınsk qus fabrıkasynan bólek, Óskemende óz óndirisindegi qus etinen shujyq ónimderi men delıkatester shyǵaratyn zaýyt jumys isteıdi. Sondaı-aq Úkimet basshysyna Almaty oblysynyń Jambyl jáne Qarasaı aýdandarynyń aýmaǵynda óndiristik qýaty 240 myń tonnany quraıtyn qus fabrıkasyn ashý jospary týraly baıandaldy. Joba TMD-daǵy eń iri joba bolady dep josparlanyp otyr. Qurylysty kelesi jyly bastaý kózdelgen. Jalpy alǵanda, qýattylyqty arttyrý eldiń qus etine degen ishki qajettiligin tolyq jabý arqyly azyq-túlik qaýipsizdigin nyǵaıtýǵa, sondaı-aq eksporttyq áleýetti arttyrýǵa múmkindik beredi. Budan ózge, Almaty oblysynda 100 myń tonnaǵa qus etin tereń óńdeý zaýytyn salý josparda bar.
Bıyl óńirdiń azyq-túlik ónerkásibi kásiporyndary 52,6 mlrd teńgeniń ónimin óndirdi, bul ótken jyldyń sáıkes kezeńimen salystyrǵanda 104,3%-dy qurady. 2024-2026 jyldary jalpy quny 123,6 mlrd teńgeni quraıtyn 74 iri ınvestıtsııalyq jobany iske qosý josparda bar. Premer-Mınıstr jobalardyń ýaqtyly iske asyrylýyn erekshe baqylaýda ustaýdy tapsyrdy.
