Oljas Bektenov Aqmola oblysynda áleýmettik jobalardyń júzege asyrylýymen tanysty
ASTANA. KAZINFORM – Aqmola oblysyna jumys sapary barysynda Qazaqstan Premer-Mınıstri Oljas Bektenov birqatar áleýmettik ınfraqurylym nysanyn aralady. Stepnogorsk qalasyndaǵy Viamedis emhanasynda otandyq densaýlyq saqtaý salasynda memlekettik-jekemenshik áriptestik tetigin qoldanýdyń tıimdiligi baǵalandy. Sondaı-aq Mánshúk Mámetova aýylyndaǵy «Ádemaý» memlekettik bóbekjaı-baqshasynda boldy.
Úkimet basshysyna Viamedis emhanasy memlekettik-jekemenshik áriptestik aıasynda salynǵany týraly baıandaldy. Búgingi tańda jobalyq qýaty bir aýysymda 1 020 adamdy qamtıtyn medıtsınalyq mekeme Stepnogorsk pen jaqyn mańdaǵy eldi mekenderdiń 64 myńǵa jýyq turǵynyna qyzmet kórsetedi.
Mekeme quramynda kúndizgi statsıonar, mamandandyrylǵan hırýrgııalyq jáne terapevtik kómek bólimshesi, Ftızıatrııa ortalyǵy jáne klınıkalyq-dıagnostıkalyq zerthana bar. Sonymen qatar kompanııa Qosshy qalasynda kópsalaly óńirlik aýrýhananyń qurylysyn bastady.
Premer-Mınıstr medıtsınalyq qyzmetterdiń sapasyn odan ári arttyrýdyń jáne ınfraqurylymdy jańǵyrtýdyń mańyzyn atap ótti.
«Memleket basshysy halyqqa Joldaýynda aıtqandaı, otandyq densaýlyq saqtaýdy damytý úshin memlekettik-jekeshelik áriptestik tetigi arqyly resýrstardy belsendi túrde tartý qajet. Jalpy MJÁ jobalaryn iske asyrý bıznestiń densaýlyq saqtaý salasyn damytýǵa jáne qoldaýǵa qatysýy biz úshin qanshalyqty mańyzdy ekenin kórsetedi. Sondyqtan MJÁ modelin belsendi qoldaný úshin ózekti máselelerdi jedel taldap, sheshýimiz kerek», - dep atap ótti Oljas Bektenov.
Sonymen qatar Premer-Mınıstr Mánshúk Mámetova aýylynda ashylǵan, búginde mektepke deıingi tárbıe máselesin sheshýge múmkindik berip otyrǵan «Ádemaý» bóbekjaı-baqshasynda boldy. Aýdany 600 sharshy metr bolatyn eki qabatty ǵımaratta sábılerge jaıly jaǵdaı jasalǵan, qazirgi ýaqytta bóbekjaıǵa 40 bala barady. Mektepke deıingi mekemeniń jobalyq qýaty 2 ese kóp – 80 adamǵa deıin qabyldaı alady.
Prezıdent Joldaýynda aıtylǵan maqsattarǵa sáıkes Úkimet mektepke deıingi bilim berýdi jan basyna shaqqandaǵy qarjylandyrý júıesin ózgertý boıynsha jumys júrgizýde. Árbir otbasynyń naqty tabysyn eskere otyryp, jańa tásildiń sapaly iske asyrylýyn qamtamasyz etý qajet.
