Oljas Bektenov ákimderge barlyq saladaǵy jaǵdaıdy tikeleı baqylaýǵa alýdy tapsyrdy
ASTANA. KAZINFORM — Ákimder tarapynan barlyq saladaǵy jaǵdaıdyń tikeleı baqylaýǵa alynýy asa mańyzdy másele. Bul týraly Úkimet otyrysynda Premer-mınıstr Oljas Bektenov aıtty.
- Bıylǵy 9 aıdyń qorytyndysy boıynsha jalpy ishki ónim ósimi 3,6 paıyzdy qurap otyr. Degenmen, ekonomıkanyń ornyqty ósýi úshin birqatar baǵytta, onyń ishinde ónerkásip, saýda jáne kólik sııaqty negizgi salalarda ósim qarqynyn arttyra túsý kerek. Óńdeý ónerkásibindegi ahýal basty nazarda bolýǵa tıis. Jyldyń josparly kórsetkishterine qol jetkizý úshin barlyq rezervti paıdalaný qajet, - dedi Úkimet basshysy.
Premer-mınıstr qabyldanyp jatqan sharalardy iske asyrý arqyly ekonomıkalyq ósim kórsetkishterine qol jetkizý jergilikti jerlerde qamtamasyz etiletinin aıtty.
- Sondyqtan ákimder tarapynan barlyq saladaǵy jaǵdaıdyń tikeleı baqylaýǵa alynýy asa mańyzdy másele. Negizgi makrokórsetkishter boıynsha 11 óńirde oń dınamıka qalyptasty. Abaı, Ulytaý jáne Atyraý oblystary artta qalyp otyr, - dedi Oljas Bektenov.
Aıta keteıik, Úkimet otyrysynda 2025 jylǵy qańtar-qyrkúıek aılaryndaǵy áleýmettik-ekonomıkalyq damý qorytyndylary men respýblıkalyq bıýdjettiń atqarylý barysy talqyǵa salynyp jatyr.