Oljas Bektenov ákimderdi qurylys maýsymyn utymdy paıdalanýǵa shaqyrdy

ASTANA. KAZINFORM – Premer-mınıstr Oljas Bektenov óńir ákimderine qurylys maýsymyn utymdy paıdalanyp, kesteden keshigip jatqan medıtsınalyq nysandardyń qurylysyn jedeldetýdi tapsyrdy.

- Aýylda densaýlyq saqtaý júıesin jańǵyrtý» ulttyq jobasy 650-den astam aýyldyq eldi mekende zamanaýı medıtsınalyq pýnktter ashýǵa múmkindik beredi. Jetisý, Ulytaý, Jambyl, Aqtóbe, Aqmola jáne Qaraǵandy oblystarynda qurylys qarqyny tym baıaý. Mysaly, Aqtóbe, Jambyl, Jetisý jáne Shyǵys Qazaqstan oblystarynda osy kúnge deıin 6 obekt boıynsha jobalyq qujattama ázirlenbegen. Qaraǵandy, Qostanaı, Aqmola, Ulytaý, Batys Qazaqstan, Soltústik Qazaqstan oblystarynda 8 joba boıynsha memlekettik saraptama daıyn emes. Óńir ákimderi tarapynan dál osy jobalaý jáne qurylys jumystaryna baqylaýdyń kemshin bolýy Ulttyq jobany iske asyrý merzimderiniń sozylyp ketýine alyp keledi. Nysandardy ýaqytyly tapsyrý úshin qurylys maýsymyn tıimdi paıdalaný kerek, - dedi Úkimet basshysy.

Oljas Bektenov Densaýlyq saqtaý mınıstrligine qalǵan 188 medıtsınalyq nysandy salý jumysyna apta saıyn monıtorıng júrgizip otyrýdy tapsyrdy.

Buǵan deıin Pavlodar aýyldarynda qaıtarylǵan aktıvter esebinen ambýlatorııalar salynatynyn jazǵan edik.