Oljas Bektenov ákimder men mınıstrlerdi nege ashyq synǵa almaıdy

ASTANA. KAZINFORM — Premer-mınıstr Oljas Bektenov Úkimet músheleriniń jumysyn ashyq synaýǵa qatysty pikir bildirdi.

— Syn aıtylady, daýys kóterip, qatty aıtý — basqarýdyń tıimdi ádisi emes. Úkimet músheleri, óńir ákimderi de úlken mektepten ótken, jaýapkershiligi joǵary adamdar. Ar — eń myqty baqylaýshy. Eger adam óz isine jaýapkershilikpen qarasa, onyń isin bireý emes, ózi jaqsy baqylaı alady. Al eger basshy qoıylǵan mindetterdi oryndaı almasa, jumys júktemesin kótere almasa, onda ol basshy bolýdan qalady. Aıǵaılap, jurttyń kózinshe sógis jarııalaǵannan nátıje shyǵady dep oılamaımyn, — dedi Oljas Bektenov Úkimet otyrysynan keıin ótken baspasóz máslıhatynda.

Premer-mınıstrdiń pikirinshe, syn konstrýktıvti bolýy kerek. 

— Úkimet otyrystarynda syn aıtpaımyz deýmen kelispeımin. Eger bireý naqty qatelik jiberse, oryndy syn aıtamyz. Odan bólek, jabyq jıyndar da bar. Jalpy jumys barysynda túrli másele týyndaıdy, syn aıtylady. Keıde óte qatty aıtylady, túrli jaǵdaı kezdesedi. Jalpy, meniń oıymsha, Úkimet quramy jumys isteýge qabiletti, Prezıdenttiń tapsyrmalaryn oryndap jatyr. Árıne, másele joq emes, biraq, máseleni múmkindiginshe sheshýge tyrysamyz, — dep tolyqtyrdy Oljas Bektenov.

Aıta ketsek, búgin Úkimet otyrysynda Oljas Bektenov Ónerkásip jáne qurylys mınıstri Ersaıyn Naǵaspaevty synǵa alyp, tapsyrma berdi. 

Sondaı-aq Úkimet basshysy otandyq týrızmdi damytý salasynda kemshilikter baryn moıyndap, árdaıym «demalys maýsymyna tolyq daıynbyz» degen ádemi esep beriletinin málim etti.