Oljas Bektenov AES-tiń jańartylatyn energııa kózderinen artyqshylyǵyn atady
ASTANA. KAZINFORM – Premer-mınıstr Oljas Bektenov Úkimet otyrysynda atom energetıkasynyń sý, jel, kún energetıkasynan artyqshylyǵy qandaı ekeni týraly paıymyn aıtty.
«Biz qazirdiń ózinde energetıkalyq qýat tapshylyǵyn tartyp otyrmyz. Problemany osy bastan sheshpesek, onda ekonomıkanyń ári qaraı ósýine qajetti elektr energııasyn úlken kólemde satyp alýymyzǵa týra keledi. Kóptegen el atom energııasyna ıek artady. Atom energııasy jónindegi halyqaralyq agenttiktiń málimetinshe búginde álemniń 31 elinde 415 ıadrolyq energoblok jumys isteıdi. Qazirgi ýaqytta 15 memlekette, sonyń ishinde Qytaı, Japonııa, Ońtústik Koreıa, Ulybrıtanııa men Túrkııada jańadan 61 atom stantsııasynyń qurylysy júrýde», - dedi ol.
Úkimet basshysynyń aıtýynsha, halyqaralyq qarjy ınstıtýttary kómir elektr stantsııalaryna ınvestıtsııa salýdan bas tartyp jatyr.
«Óıtkeni jahandyq kún tártibinde kómirtegi beıtaraptyǵy máselesi tur. Osy turǵydan alǵanda da atalǵan máseleniń mańyzy arta beretin bolady. Al, jańartylatyn qýat kózderi turaqty energııamen qamtamasyz ete almaıdy. Bizde gıdroelektr stantsııalarynyń áleýeti shekteýli, óıtkeni energııa óndirý úshin talapqa saı keletin ózender joqtyń qasy. Gazdandyrý máselesine kelsek, qoldanystaǵy Jylý ortalyqtarynyń keıbireýin gazǵa aýystyryp, jańadan bý-gaz qondyrǵylaryn salyp jatyrmyz. Alaıda, ekonomıkanyń damýy men halyq sanynyń ósýin eskersek, keleshekte ol da elektr energııasynyń tapshylyǵyn jabýǵa jetkiliksiz bolady. Sondyqtan atom energetıkasyn damytý – biz úshin bolashaǵy óte zor baǵyt», - dedi Oljas Bektenov.
