Oljas Bektenov Abaı oblysynyń aktıvine jańa ákimdi tanystyrdy
ASTANA. KAZINFORM – Memleket basshysynyń tapsyrmasy boıynsha Premer-mınıstr Oljas Bektenov pen Prezıdent Ákimshiliginiń basshysy Aıbek Dádebaı Abaı oblystyq máslıhattary depýtattarynyń jınalysyna qatysty. Bul týraly Úkimettiń baspasóz qyzmeti habarlady.
Depýtattarǵa Memleket basshysynyń Abaı oblysynyń ákimi laýazymyna eki kandıdatty – Qazaqstan Respýblıkasy Prezıdentiniń keńesshisi – Prezıdenttiń baspasóz hatshysy Berik Ýálı men Abaı oblysy Kýrchatov qalasynyń ákimi Bolat Ábdiralıevti usyný týraly haty oqyldy. Ashyq daýys berý qorytyndysy boıynsha 126 depýtattyń 102-si Berik Ýálıdiń kandıdatýrasyna daýys berdi. Bolat Ábdiralıevtiń kandıdatýrasyn 24 depýtat jaqtady. QR Prezıdentiniń tıisti Jarlyǵymen Berik Ýálı Abaı oblysynyń ákimi bolyp taǵaıyndaldy.
Oblys aktıvimen kezdesýde Premer-mınıstr óńirdiń damýyna qosqan úlesi úshin Nurlan Uranhaevqa alǵys bildirdi.
Oljas Bektenov oblystyń jańa ákimi Berik Ýálıdi tanystyrdy. Óńir basshylyǵy aldyna Prezıdent ekonomıkany ártaraptandyrýǵa jáne ınvestıtsııalyq ahýaldy jaqsartýǵa basa nazar aýdara otyryp, óńirdi áleýmettik-ekonomıkalyq damytý jóninde aýqymdy mindetter qoıǵany atap ótildi. Alakól kóliniń, óńirdegi tarıhı jáne mádenı oryndardyń áleýetin asha otyryp, týrızm salasyna erekshe kóńil bólý qajet.
Abaı oblysy Reseı jáne Qytaımen shektesedi, halyqaralyq tranzıttik saýda toraby sanalady, sondyqtan qolda bar tranzıttik áleýetti barynsha paıdalaný qajet.
Aıagóz-Tachen baǵytyndaǵy temirjol jáne «Baqty» qurǵaq porty qurylysy boıynsha mańyzdy ınfraqurylymdyq jobalardy iske asyrý máselelerin baqylaýda ustaý tapsyryldy. Sondaı-aq óńir halqyn sapaly ári qoljetimdi azyq-túlikpen qamtamasyz etý úshin aýyl sharýashylyǵy ónimderin qaıta óńdeýdi damytýdyń mańyzdylyǵy atap ótildi.
Berik Ýálı Abaı oblysynyń ákimi bolyp taǵaıyndalǵanyn jazǵan bolatynbyz.