Qazaqstandyqtardyń bir bóligi deklaratsııa tapsyrýdan bosatyldy
ASTANA. KAZINFORM – Jeke tulǵalardyń aktıvteri boıynsha barlyq aqparat bar. Bul týraly Úkimet otyrysynda Premer-Mınıstr Oljas Bektenov aıtty.
«Prezıdent jappaı deklaratsııalaý tásilderin qaıta qaraýdy tapsyrdy. Qazir deklaratsııany 4 mıllıonnan astam adam tapsyrady. Olardyń ishinde memlekettik qyzmetshiler, kvazımemlekettik sektor men bıznes ókilderi bar. 2025 jyly azamattardyń qalǵan barlyq sanattary da deklaratsııa tapsyrady dep josparlanǵan bolatyn. Buǵan halyq alańdaýshylyq bildirdi, sondyqtan atalǵan máselege Memleket basshysy óziniń nazaryn aýdardy. Búgingi tańda memlekettik organdardyń derekter bazasy barynsha tsıfrlandyrylǵan. Qarjylyq jáne valıýtalyq baqylaý kúsheıtildi», - dedi Úkimet basshysy.
Premer-Mınıstrdiń atap ótýinshe, halyqaralyq kelisimder aıasynda shottar boıynsha derekter almasý jolǵa qoıyldy. Tsıfrlyq qyzmetter kórsetý keń taralǵan.
«Sondyqtan jalpy alǵanda, jeke tulǵalardyń aktıvteri boıynsha barlyq aqparat bar. Qarjy jáne Tsıfrlandyrý mınıstrlikteri tirkeý jáne salyqtyq baqylaý úshin barlyq tsıfrlyq bazalardan, onyń ishinde ekinshi deńgeıdegi bankterden málimetter alýdy qamtamasyz etkeni jón. Sondyqtan men 2025 jyly azamattardyń qalǵan sanattaryn aktıvter týraly deklaratsııalardy mindetti túrde tapsyrýdan bosatý týraly Qarjy mınıstriniń usynysyn qoldaımyn. Osyǵan baılanysty Qarjy mınıstrligi Ulttyq ekonomıka, Ádilet mınıstrlikterimen birge úsh kún merzimde qajetti zańnamalyq túzetýlerdi ázirlep, Parlamentte tıisti jumys júrgizýi kerek», - dedi Oljas Bektenov.
Búgin Úkimet otyrysynda Qarjy mınıstri Mádı Takıev deklaratsııa tapsyrýdan bosatylatyn sanatty ataǵan edi.
Buǵan deıin Prezıdent deklaratsııalaýǵa qatysty máseleni jan-jaqty pysyqtaýdy tapsyrdy.
