Oljas Bektenov 100 iri jobany tsıfrlyq teńgege kóshirýdi tapsyrdy
ASTANA. KAZINFORM — Úkimette Prezıdenttiń ashyqtyqty arttyrý úshin bıýdjettik saıasatqa tsıfrlyq teńgeni ıntegratsııalaý jónindegi tapsyrmasynyń oryndalý barysy qaraldy. Bul týraly Úkimettiń baspasóz qyzmeti habarlady.
Premer-mınıstr Oljas Bektenov tsıfrlyq teńgeniń kómegimen aqshany tańbalaýǵa jáne qadaǵalaýǵa baılanysty pılottyq jobalardy júzege asyrý jóninde jıyn ótkizdi. Bul Memleket basshysynyń Qazaqstan halqyna Joldaýynda atap ótken qarjy júıesin tsıfrlyq transformatsııalaý jáne memlekettik basqarýdyń tıimdiligin arttyrý úshin ozyq tehnologııalardy engizý bóligindegi mindetterge sáıkes keledi.
Jıynda memlekettik jumsaý úderisterine ulttyq tsıfrlyq valıýtany engizýdiń barysy qaraldy.
Talqylaýǵa sondaı-aq Premer-mınıstrdiń orynbasary — ulttyq ekonomıka mınıstri Serik Jumanǵarın, tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev, eńbek jáne halyqty áleýmettik qorǵaý mınıstri Svetlana Jaqypova, qarjy mınıstri Mádı Tákıev jáne beıne konferentsııa baılanysy arqyly ishki ister mınıstri Erjan Sádenov, memlekettik qyzmet isteri agenttiginiń tóraǵasy Darhan Jazyqbaı qatysty.
Ulttyq bank tóraǵasy Tımýr Súleımenov búgingi tańda aınalymǵa 257,5 mlrd tsıfrlyq teńge shyǵarylǵanyn habarlady. Platforma qazir tájirıbelik-ónerkásiptik paıdalaný kezeńinde, aldaǵy jeltoqsan aıynda ony tolyqqandy iske qosý josparlanyp otyr.
Ulttyq banktiń tsıfrlyq transformatsııalaý jetekshisi Bınur Jalenov baıandaǵandaı, tsıfrlyq teńge búginde onnan astam baǵyt boıynsha synalǵan. Atap aıtqanda, tsıfrlyq QQS salyqty qaıtarý merzimin 75-ten 5 jumys kúnine deıin qysqartýǵa múmkindik týdy. Joldardy jóndeýge arnalǵan qarajatty tańbalaý «Pavlodar — Atyraý» jáne «Muqyr — Qulsary» jobalarynda synaldy. Sondaı-aq «Dostyq — Moıynty» temir jolynyń jáne «Taldyqorǵan — Úsharal» gaz qubyry ýchaskesiniń qurylysyn qosa alǵanda, Ulttyq qordan qarjylandyrylatyn jobalarǵa bólingen qarjynyń maqsatty jumsalýyn baqylaý úshin de paıdalanylýda. Aldaǵy ýaqytta «Beıneý — Bozoı — Shymkent» gaz qubyryn, gaz bólý kesheni jáne «Baqty — Aıagóz» temirjol ýchaskesi sııaqty jobalardy júzege asyrý josparda tur. Budan basqa, «Aýyl amanaty» shaǵyn nesıeleý baǵdarlamasy aıasynda qarajatty ýaqytsha buǵattaý tetigi synaqtan sátti ótti.
Tsıfrlyq teńgeni engizý, sondaı-aq jyljymaıtyn múlikpen jáne avtokólikpen mámileler jasaý, mekteptegi tamaqtaný, qymbat taýarlardy satyp alý, agroónerkásiptik keshendegi memlekettik nesıeleý quraldary sııaqty basqa da baǵyttarda pysyqtalyp jatyr.
Jıynda sondaı-aq normatıvtik-quqyqtyq bazany jetildirýge de nazar aýdaryldy. Búgingi tańda «Tólemder jáne tólem júıeleri týraly» zańǵa, tsıfrlyq shot uǵymyn jáne basqa da ilespe normalardy engizýdi qosa alǵanda, birqatar túzetý daıyndalǵan.
Premer-mınıstr tsıfrlyq teńgeniń negizgi artyqshylyqtaryn atap ótti. Olar — baǵdarlamalaýǵa jáne tańbalaýǵa ıkemdigi. Bul qarajattyń qozǵalysyn qadaǵalaýǵa jáne maqsatsyz paıdalanýdyń aldyn alýǵa múmkindik beredi.
— Memleket basshysynyń tapsyrmasyna sáıkes, tsıfrlyq teńgeniń kómegimen aqshany tańbalaý jáne qadaǵalaý boıynsha pılottyq jobalar kezeń-kezeńimen júzege asyrylýda. Tsıfrlyq teńge bıýdjet qarajatyn maqsatty paıdalanýda tolyq ashyqtyqty jáne júıeli baqylaýdy qamtamasyz etedi. Aqshany tańbalaýdy keńeıtýdi tıimdi júzege asyrý úshin aqparattyq júıelerdiń «Tsıfrlyq teńge» platformasymen ýaqtyly ıntegratsııalanýyn qamtamasyz etý qajet. Sondaı-aq tıisti normatıvtik quqyqtyq bazany pysyqtaý talap etiledi. «Boıalǵan aqsha» tetigin engizý sapaly jáne tolyq kólemde júzege asyrylýy tıis. Jaqyn arada Ulttyq qor men bıýdjet esebinen qarjylandyrylatyn keminde júz iri jobany «tsıfrlyq teńge» formatyna aýystyrýdy tapsyramyn, — dep atap ótti Oljas Bektenov.
Jıyn qorytyndysy boıynsha Premer-mınıstr memlekettik organdarǵa Ulttyq bankpen jáne múddeli uıymdarmen birlesip, ekonomıkanyń jekelegen sektorlaryna tsıfrlyq teńgeni keń kólemde jedel ıntegratsııalaý jónindegi Jol kartasyn ázirleýdi tapsyrdy.
Aıta ketelik elimizde tsıfrlyq teńge jobasy aıasynda alǵashqy jol qoldanysqa berilgen edi.