«Oljas aıtys ónerin ıÝNESKO deńgeıinde qorǵaýǵa daıyn» - respýblıkalyq basylymdarǵa sholý
***
«Keshe Memleket basshysy Nursultan Nazarbaev jumys saparymen Mańǵystaý oblysyna keldi», - dep jazady «Egemen Qazaqstan» gazeti. Aqtaý qalasynda Prezıdent oblys aktıvimen, kórnekti jurtshylyq, zııaly qaýym ókilderimen, munaı kompanııalary eńbek ujymdarynyń ókilderimen kezdesip, Jańaózen qalasynda oryn alǵan qaıǵyly oqıǵalar máseleleri jóninde keńes ótkizdi. Memleket basshysy óz sózinde Jańaózen qalasyn qalpyna keltirý, qalanyń tirshiligin qamtamasyz etetin nysandardyń jumys isteýin jolǵa qoıý, sondaı-aq jumystan shyǵarylǵan eńbekkerlerdi jumysqa ornalastyrý jóninde barlyq sharanyń qabyldanatynyn atap ótti. Sonymen birge, Prezıdent Qazaqstan zańnamalarynyń barlyq talaptaryn buljytpaı oryndaý qajettigin atap kórsetti. Memleket basshysy oblys aktıvine jańa ákimdi tanystyrdy. Mańǵystaý oblystyq máslıhatynyń kelisimimen óńir ákimi laýazymyna Baýyrjan Muhametjanov taǵaıyndaldy.
«Egemen Qazaqstan» gazetiniń jazýynsha, Astanada Memlekettik hatshy Qanat Saýdabaevtyń tóraǵalyq etýimen Qazaqstan Respýblıkasy Prezıdentiniń janyndaǵy Azamattyq máseleler jónindegi komıssııanyń májilisi men Memlekettik rámizder jónindegi respýblıkalyq komıssııanyń otyrysy ótti. Alǵashqy Májiliste Q.Saýdabaev Elbasy tıisti Jarlyqqa qol qoıǵannan keıin TMD elderi men alys shet elderden kelgen 700-den astam adam Qazaqstan Respýblıkasynyń azamattary bolatynyn málimdedi. Al ekinshi otyrys barysynda Baılanys jáne aqparat, Kólik jáne kommýnıkatsııalar mınıstrleriniń memlekettik rámizderdi paıdalaný jáne nasıhattaý jónindegi jumystary týraly esepteri tyńdaldy. Sońynda «Memlekettik rámizder týraly» Qazaqstan Respýblıkasynyń Konstıtýtsııalyq zańynyń buljytpaı saqtalýy jóninde usynystar men naqty tapsyrmalar berildi.
***
Aıtys ónerin álemdik deńgeıde aıshyqtap, ıÝNESKO-nyń qorǵaýyna ótkizý máselesi sońǵy kezde jıi kóterilip júr. Endi álemdik qaýmdastyq tórinde aıtys tárizdi bekzat óner qaı halyqqa, qaı ultqa tıesili degen másele talqylanyp jatyr. Osy oraıda «Aıqyn» gazetiniń búgingi nómirinde jaryq kórgen «Oljas aıtys ónerin ıÝNESKO deńgeıinde qorǵaýǵa daıyn» degen taqyryppen maqala jarııalandy. Qazaqstannyń ıÝNESKO-daǵy elshisi Oljas Súleımenov basylymǵa: «Eger tıisti organdar ıÝNESKO-ǵa hat jazsa, onyń qazaq ultyna tıesili ekendigin dáleldep qorǵap shyǵýǵa daıynmyn. Aıtys óner retinde BUU-nyń ıÝNESKO komıssııasynyń baǵdarlamasyna tirkeldi. 2013 jyldan bastap ıÝNESKO arqyly qarjylandyrylyp qalýy ábden múmkin», - depti.
***
«Alash aınasy» gazetiniń jazýynsha, burynǵy Tótenshe jaǵdaılar mınıstri, Almaty qalasynyń bir kezdegi ákimi Vıktor Hrapýnovqa qatysty birneshe bap boıynsha qylmystyq is eki aıdan beri tergelip jatyr. Bul aqparatty QR Ekonomıkalyq qylmysqa jáne sybaılas jemqorlyqqa qarsy kúres agenttiginiń basshysy Qaırat Qojamjarov rastap otyr. Aqparat «Hrapýnovqa qatysty birneshe qylmystyq is tergelý ústinde» degen taqyryppen berilgen.
Osy basylymnyń turaqty «Dat!» aıdarynda S.Toraıǵyrov atyndaǵy Pavlodar memlekettik ýnıversıtetiniń rektory, professor Erlan Arynmen aradaǵy suhbat «Maǵan áýlıelerge kesene ornatý keıinge qaldyrýdy kútpeıtin, zańdy túrde oryndalýy tıis nársedeı kórinedi» degen taqyryppen berilgen. Basylymnyń barlyq saýaldaryna tuşymdy jaýap bergen ol: «Qazir dáýir basqa, jaǵdaı basqa, ómirge kózqaras ta bólek. Qazaq álemdegi básekeles ultqa aınalyp keledi. Tildiń sheberligi emes, tehnokratızm, kompıýtermen jumys basym», - deıdi. Suhbattyń tolyq nusqasyn basylymnyń búgingi sanynan oqı alasyzdar.
***
«Keshe Memleket basshysy Nursultan Nazarbaev Jańaózen qalasyn qalpyna keltirý máseleleri jóninde keńes ótkizdi», - dep jazady «Kazahstanskaıa pravda» gazeti. Basylymnyń atap ótýinshe, Prezıdent Ákimshiliginiń Basshysy A.Mýsın Elbasyn aǵymdaǵy jyldyń 17 jeltoqsanynda ótken Qaýipsizdik Keńesiniń otyrysynda berilgen tapsyrmalardyń oryndalýyn uıymdastyrý barysy týraly habardar etse, Premer-Mınıstrdiń birinshi orynbasary Ó.Shókeev Prezıdentke arnaıy komıssııanyń Mańǵystaý oblysynyń Jańaózen qalasyndaǵy jappaı tártipsizdikke baılanysty týyndaǵan áleýmettik-ekonomıkalyq, gýmanıtarlyq jáne ózge problemalardy jedel sheshý jónindegi jumysy týraly baıandady.
