Oljas Anafın áleýmettik salada tsıfrlandyrýdy damytý josparlary týraly aıtty
ASTANA. KAZINFORM – «Áleýmet» áleýmettik qyzmetter portaly damytylady. Bul týraly Prezıdent janyndaǵy Ortalyq kommýnıkatsııalar qyzmetinde ótken brıfıngte Eńbek jáne halyqty áleýmettik qorǵaý vıtse-mınıstri Oljas Anafın aıtty.
Oljas Anafın buǵan deıin Qazaqstanda Otbasynyń tsıfrlyq kartasy iske qosylǵanyn atap ótti, ol ózin monıtorıng jáne halyqqa qoldaý kórsetý quraly retinde oń kórsetti. Qazirgi ýaqytta osy platformany damytý máseleleri pysyqtalýda.
«Ómirlik qıyn jaǵdaıdaǵy otbasylardy keshendi qoldaýdy iske asyrý jáne osal azamattardy qoldaýdyń tıimdiligi men belsendiligin arttyrý úshin bolashaqta Bas prokýratýra men ІІM aqparattyq júıelerimen túrli quqyq buzýshylyqtar men turmystyq zorlyq-zombylyq jaǵdaılary týraly aqparat alý bóliginde ıntegratsııa júrgizetin bolamyz», – dep atap ótti Oljas Anafın.
Onyń atap ótýinshe, arnaýly áleýmettik qyzmetter kórsetý ortalyqtaryn tsıfrlandyrý aıasynda áleýmettik qyzmetterge qoljetimdilikti jaqsartý jáne uıymdar jumysynyń tıimdiligin arttyrý úshin tehnologııalardy engizý, onyń ishinde áleýmettik salany kadrlyq qamtamasyz etýdi avtomattandyrý (attestattaý men testileýdi qosa alǵanda) júrgiziledi. Bul Ǵylym jáne joǵary bilim mınıstrlikteriniń aqparattyq júıelerimen ıntegratsııany qajet etedi.
«Taǵy bir mindet – múgedektigi bar azamattarǵa beriletin ońaltý quraldarynyń sapa jáne qaýipsizdik standarttaryna sáıkestigin qamtamasyz etý. Ol úshin «Áleýmet» áleýmettik qyzmetter portalynyń Dárilik zattardy, medıtsınalyq maqsattaǵy buıymdar men medıtsınalyq tehnıkany saraptaý ulttyq ortalyǵymen ıntegratsııasy júrgizildi, budan ári Memlekettik kirister komıtetiniń derekqorymen ıntegratsııa júrgizýdi josparlap otyrmyz», – dedi vıtse-mınıstr.
