Olympic Channel Denıs Ten jaıynda fılm túsirdi
ASTANA. QazAqparat - Olympic Channel Sochı Olımpıadasynyń qola júldegeri Qazaqstandy mánerlep syrǵanaýshy Denıs ten jaıyndyq derekti fılmin jarııa etti, dep habarlaıdy QazAqparat.
Denıs Ten Instagramdaǵy paraqshasynda bul fılmniń Game Breakers kópserııaly jobasy aıasynda shyǵarylǵandyǵyn atap ótken. Fılmniń alǵashqy epızodynda sportshynyń ómiri jaıynda syr shertilip, Denıs Tenniń mánerlep syrǵanaýdan Qazaqstan atyn shyǵarǵandyǵy sóz bolady.
«Muz aıdynyna alǵash ret shyqqanymda mánerlep syrǵanýmen aınalysý oıymda da bolǵan emes. Bizde muz aıdyny da, konkı satyp alatyn jer de bolǵan joq. Shamamen 9 jasyma deıin kásibı sporttyq qural-jabdyqtar da bolǵan emes. 5 jasymda menen mánerlep syrǵanaý álde mýzyka unaı ma dep surady. Men mánerlep syrǵanaý dep jaýap berdim. Bul shynymen lázzat alatyn, jan-tánimmen súıetin isim», - dedi sportshy.
Onyń aıtýynsha, 9 jasynda anasy Sibirde ótetin jarysty estip sonda aparǵan.
«Men jeńiske jettim. Meni eshkim de bilmeıtin. Árıne, Qazaqstandaǵy mánerlep syrǵanaý týraly da eshkim bilgen joq. Sol kezde mánerlep syrǵanaý meniń jumysym emes, ózim ekendigin uǵyndym», - dedi Denıs Ten.
Sportshynyń atap ótýinshe, Koreıadaǵy qysqy Olımpıada oıyndaryna qatysý barynsha mańyzdy.
«Koreıada óner kórsetý qoıylymymdy usynýdyń múmkinshiligi. Meniń arǵy atalarym Koreıanyń táýelsizdigi úshin kúresken generaldardyń biri bolǵan. Ol men jaıynda ne oılar edi, maqtanar ma edi? Sondyqtan men úshin bul aıryqsha qatysý bolmaq. Koreıaǵa erekshe baǵdarlama ákeletin bolamyn», - dedi Denıs.
