OLX-tegi «jetkizý qyzmeti» elordanyń 100-den astam turǵynyn san soqtyryp ketti

NUR-SULTAN. QazAqparat - «OLX jetkizý» qyzmetiniń atyn jamylǵan alaıaqtar jarnama saıttarynda áli de «óz qyzmetin» usynyp keledi, dep habarlaıdy QazAqparat Nur-Sultan qalasynyń polıtsııa departamentiniń baspasóz qyzmetine silteme jasap.

Taýardy satý týraly habarlandyrýdy ornalastyrǵannan keıin alaıaqtar satyp alýshy bolyp baılanysqa shyǵady, nómirlerdi bir kún ǵana paıdalanyp, artynsha óshirip tastaıdy.

Hat almasý barysynda alaıaqtar basqa qalada ekenin túsindirip, «jetkizý» qyzmetin paıdalanýdy usynady. ıAǵnı, kartadan tólem jasalǵannan keıin kýrer satýshydan kelip zatyn alady.

Ol úshin alaıaqtar jalǵan siltemeni jiberedi. Bir qaraǵanda, silteme eshqandaı kúdik týdyrmaıdy, biraq basqan kezde paıdalanýshyny fıshıngtik saıtqa jiberedi. Bul saıtta bank kartasy, CVV-kody, JSN kórsetilgen saýalnamany toltyrý, ótinimdi jiberý jáne aqsha aýdarymyn kútý usynylady.

Satýshy ótinimdi jibergennen keıin, kórsetken barlyq derekter fıshıngtik saıt arqyly alaıaqtardyń qolyna túsedi. Budan ári, olar ınternet-bankıngtiń eseptik jazbasyna kiredi, aqshaǵa tolyq qol jetkizedi jáne qolda bar aqshany kart-shottardan lezde urlaıdy. Al alaıaqtyq saıt birneshe sekýndtan keıin buǵattalady da joq bolady.

Jyl basynan beri atalǵan alaıaqtyq shemasynan júzden astam astanalyq zardap shekti. Shyǵyn shamamen 2 mln teńgeni qurady. Barlyǵy boıynsha qylmystyq is qozǵaldy.

Nur-Sultan qalasynyń polıtsııa departamenti azamattarǵa bank kartalarynyń derektemeleri men jeke derekterin bermeý týraly eskertedi. Saıttyń siltemesi men túpnusqalyǵyna nazar aýdarý qajet. Fıshıngtik saıttardyń ataýynda qosymsha hat nemese belgi bolady. Ádette alaıaqtar taýardy ony kórip, teksermeı-aq satyp alýǵa kelisedi.