OLX-tegi jarnama, «operatordan» qońyraý: Aqmola oblysynyń 33 turǵyny san soǵyp qaldy

ASTANA. KAZINFORM — Aqmola oblysynyń 33 turǵyny alaıaqtardyń arbaýyna túsip qalǵan, dep habarlaıdy óńirlik prokýratýranyń baspasóz qyzmeti.

Taǵy da marketpleıster arqyly taýar satyp alý, sondaı-aq qońyraý shalǵan «uıaly baılanys operatorlaryna» sený arqyly azamattar aqshasynan aıyryldy.

Osy aptada belgisiz tulǵa oblys turǵynyna telefon soǵyp, ózin UQK-niń qyzmetkerimin dep tanystyryp, alaıaqtyq jolmen 750 myń teńge nesıe resimdegen.

Basqa bir jaǵdaıda, OLX arqyly páter jaldaǵysy kelgen 3 adam alaıaqqa 115 000 teńge aldyn ala tólem aýdarǵan.

Qazirgi ýaqytta alaıaq anyqtalyp, qamaýǵa alyndy.

Oblys prokýratýrasy satýshynyń senimdiligine kóz jetkizbeı, taýardyń tolyq tólemin aýdarmaýǵa keńes beredi.