Óltirilgen bankır Tátishevtiń murasy qalaı bóliske salynǵan - Tarazdaǵy sot
«Turan Álem Banki» basqarma tóraǵasynyń burynǵy keńesshisi Merýert Jaqsylyqova «Turan Álem Banki» AQ basshysy Erjan Tátishev qaza bolǵannan keıin, sol ýaqytta aktsııalardyń baqylaýshy paketi qolynda bolǵan onyń jesiri Anar Aıtjanova ózin Dırektorlar keńesiniń quramyna kirýge úgittegenin aıtty.
«Banktiń Dırektorlar keńesiniń quramyna kirýime Anar qolǵabys etip, banktiń naqty ahýalyna qanyq bolý úshin esep-qısaptardy qarap shyǵýymdy ótindi. Osy tapsyrmany oryndaýǵa kiriskenimde Anar men Erjannyń baýyrlary - Erlan jáne Erkin arasyndaǵy qarym-qatynastar shıelenisti ekenin baıqadym. Óıtkeni bankti basqarý men oǵan ıelik etýdiń taǵdyry aıqyndalyp jatqan edi», - dedi kýáger.
Merýert Jaqsylyqova eki ottyń arasynda qalǵysy kelmeı, bankten ketýdi sheshken. «Men jumysqa barmaı qoıdym. Sonda Anar úıime kelip, banktiń jumysyna kómektesýge taǵy da úgitteı bastady. Biraq men bas tarttym. Júıkem syr berdi, bank bóliske salynyp jatqan oqıǵalarǵa jaýapty bolyp qalýym múmkin edi. Anar meniń jaǵdaıymdy túsinip, sheshimimdi qýattady», - deıdi ol.
M. Jaqsylyqovanyń sózine qaraǵanda, 2005 jyldyń qys aıynda «Bata» kompanııasynyń keńsesinde Anar Aıtjanova, Talǵat Aqsambıev, Baýyrjan Beısembaev, Qaırat Sadyqov jáne óziniń qatysýymen kezdesý ótken. Onda Q. Sadyqov Anarǵa «BTA» bankiniń aktsııalary tıesili kompanııalardyń tizimin usynǵan.
«Tizim Anar men Aqsambıevtiń yzasyn keltirdi. Olardyń pikirinshe, tizim ne tolyq bolmady, ne qate edi. Olar aqyryp, narazylyǵyn bildire ketti. Urys-keris bastalǵan soń, men kezdesýden ketip qaldym. Men ondaı jaǵdaıda júrgim kelmeı, jumysqa múldem shyqpaı qoıdym», - dedi ol.
Sodan keıin, 2005 jyldyń aqpanynda Merýert Jaqsylyqova Máskeýge ketip, jazǵa deıin sonda bolǵan. Sosyn maýsymda Almatyǵa oralǵan.
«Kelgenimde maǵan banktiń basqarma tóraǵasynyń orynbasary Ǵabdýllın Nııazbek qońyraý shaldy. Ol qaýipsizdik bólimshelerine jaýapty edi. Ol «BTA» bankiniń burynǵy top-menedjeri Jaqsylyq Jarymbetov menimen kezdespek oıy bar ekenin aıtty. Kezdesý «Samal-2» yqsham aýdanynda ótti. Jarymbetov kezdesýde Dırektorlar keńesiniń quramynan shuǵyl túrde shyǵýym qajettigin aıtty. Men onyń talabymen kelisetinimdi jetkizdim. Sonda menimen sóılesken Anar Ábilıazov qorqynyshty adam ekenin aıtty. Ol qatty qobaljyp tur edi», - dedi kýáger.
Keıin Merýert Jaqsylyqova basqa uıymǵa jumysqa turǵan. 2007 jyly «Premer Fınans Konsaltıng» JShS-ny quryp, qazirge deıin sol jerde jumys istep keledi.
Ol sotta Erjan Tátishevten aqsha bopsalaý faktisi týraly naqty eshteńe bilmeıtinin jetkizgen. «Meniń bilýimshe, sol kezderi Anar balalaryn alyp shekara asyp ketken, al Erjan biraz ýaqyt bank ǵımaratynda turǵan edi», - dedi M. Jaqsylyqova.
Aıta keteıik, búgingi sot otyrysynda QR Ulttyq qaýipsizdik komıteti Aqparattyq júıeler qyzmeti 1-shi ortalyǵynyń basshysy laýazymyn atqarǵan Bekbolat Qanǵojın bankır Tátishevtiń artynan baqylaý qalaı júrgizilgenin aıtyp berdi. Onyń sózinshe, Tátishevti baqylaý jónindegi nusqaýdy oǵan QR UQK tóraǵasy N.N. Dútbaevtyń ózi bergen.
Eske salaıyq, «QazQurylysShyny» JShS basshysy M. Toqmádı «Turan Álem Banki» AQ (qazirgi «BTA bank») Erjan Tátishevti 2004 jyldyń 19 jeltoqsanynda Jambyl oblysy Qordaı aýdany Otar stansasy mańynda ańshylyqqa shyqqan kezde atyp óltirgenin moıyndady. Onyń ólimine atalǵan baktiń burynǵy basshysy Muhtar Ábilıazov tapsyrys bergen.
Budan bólek, jemqorlyq jasaǵanyn - QR ІІM Tergeý-jedel tobynyń basshysy Erjan Artyqbaevqa aqshalaı syıaqy bergenin de moınyna alǵan. Endi M.Toqmádıge 1997 jylǵy redaktsııadaǵy QR QK 96-baby 2-bólimi «j», «z» tarmaqtarynda (adamdar toby, aldyn ala sóz baılasý arqyly adamdar toby jasaǵan, paıda tabý maqsatymen, sol sııaqty jaldanyp ne qaraqshylyqpen, qorqytyp alýshylyqpen ne bandıtızmmen adam óltirý) qarastyrylǵan qylmystar jasady degen aıyp taǵylýda.
Sot barysynda aıyptalýshy ózine taǵylǵan aıyptardyń bári negizdi ekenin aıtyp, Erjan Tátishevti óltirgendigin tolyqtaı moıyndaǵan bolatyn.
E. Tátishevtiń ólimi boıynsha M. Toqmádıge qatysty qylmystyq is 79 tomnan turady. Protseske sýdıa Azamat Tilepov tóraǵalyq etýde.
