Ol sátte ataqty oılap otyratyn shama bolmady — AQSh-ta erlik kórsetken akterler

LOS-ANDJELES. KAZINFORM — 27 jastaǵy akter Sannurjan Súleımen Los-Andjeles mańynda jol apatyna túsken amerıkalyq azamattyń ómirin aman alyp qaldy. Bolǵan jaǵdaı týraly akterdiń áriptesi Aıdana Saharı Jibek Joly arnasynyń «Búgin LIVE» baǵdarlamasyna onlaın baılanysqa shyǵyp aıtyp berdi.

— Bizdi belgili rejısser, kınoprodıýser Erkin ıAlgashev óziniń úıine shaqyrǵan edi. Sol otyrys bolyp jatqan kezde qatty dybys shyqty. Úıdiń tómengi jaǵynda kele jatqan mashına joldan shyǵyp ketip, úlken taýdan shuńqyrǵa qulap ketken eken. Kórgen kezde ne isterimizdi bilmeı qaldyq. Sol arada Sannurjan ekeýmiz birinshi bolyp júgirip bardyq. Biraq ol maǵan qyz bolǵan soń osynda qal dedi. Sannurjan ózi bıik quzdan áreń degende tústi. Mashına ózenge qulapty. Kóliktiń ishinde bir ǵana adam bolǵan eken. Sannurjan sol jerden adamdy qutqaryp qaldy. Jasy úlken kisi eken. Sannurjan barǵanda kólik janyp jatty. Ol kisi mashınadan shyǵyp úlgeripti, biraq kóliktiń astynda qalyp qoıǵan. Alǵashynda kóliktegi qaýipsizdik jastyqtary jaryla bastady. Sannurjan úıge júgirip kelip, shelek sekildi nárse izdedi. Ózennen sý alyp, órtenip jatqan kólikke quımaqshy boldy, — deıdi aktrısa.

Aıdananyń aıtýynsha, dárigerler men qutqarýshylar 40 mınýttan soń ǵana kelgen.

— Ol jaqta baılanys ta ustamaıdy eken. Erkin myrza Starlink baılanysy arqyly aýrýhanaǵa habarlasty. Ol kisini joǵaryǵa shyǵarýdyń ózi ońaı bolǵan joq. Erkin aǵa úıinde bar arqandardy ákelip, áreń shyǵardy. Aýrýhana qyzmetkerleri de, órt sóndirýshiler de alysta bolǵandyqtan birden kele qoımady. Sol arada Sannurjan ózi talpynyp, qoldan kelgenshe kómektesti, — deıdi ol.

Aktrısa bul jaǵdaıdyń haıp emestigin aıtyp, jýrnalısterge qulaqqaǵys jasady.

— Maǵan Sannurjan osy jaǵdaılardyń bárin túsirip tur dedi. Óıtkeni, bir jaǵdaı bola qalsa, osy vıdeolardy dálel retinde kórsete alatynymyzdy aıtty. Maǵan jýrnalıster men kóp adam habarlasyp, «Nege bulaı istedińder? Haıp pa?» dep surap jatyr. Bul haıp úshin túsirilgen joq. Ol sátte ataqty oılap otyratyn da shama bolmady, — deıdi Aıdana Saharı.

Buǵan deıin qazaq akteri Sannurjan Súleımen, rejısser ári prodıýser Erken ıAlgashev, dybys rejısseri Dýman jáne aktrısa Aıdana Saharı AQSh-ta jol apatyna ushyraǵan amerıkalyq júrgizýshini qutqaryp qalǵanyn jazǵanbyz.