Ólimmen aıaqtalǵan alǵashqy kezdesý: sottalýshynyń isi qaıta qaraldy

ALMATY. KAZINFORM – Almaty qalalyq sotynda apellıatsııalyq tártipte T.-ǵa qatysty qylmystyq is qaraldy. Ol buǵan deıin sot úkimimen abaısyzda adam ólimine ákep soqtyrǵany úshin (QK-niń 104-babynyń 1-bóligi) kináli dep tanylǵan. Sottalýshyǵa 2 jyl 6 aıǵa bas bostandyǵynan aıyrý jazasy taǵaıyndalǵan.

Biraq sot protsesine qatysýshylar bul sheshimge apellıatsııalyq shaǵym túsirdi. Іs materıaldaryn zerdeleý barysynda sot alqasy 2023 jyldyń qazan aıynda kafeden shyǵý barysynda taksıge qatysty týyndaǵan janjal kezinde, sottalýshy T. jábirlenýshi K.-ny kúshtep ıterip jibergenin anyqtady. Nátıjesinde K. aryqqa qulap, basynyń artqy jaǵymen beton aryǵynyń shetine soǵylyp, alǵan jaraqatynan qaıtys bolǵan.

«Іs materıaldaryn zerdelep, kórsetilgen mán-jaılardy, sondaı-aq saraptamanyń qorytyndysyn eskere otyryp, sot alqasy buryn shyǵarylǵan úkimniń kúshin joıdy. Alqa qaýlysymen T. abaısyzda adamnyń ólimine ákep soqtyrǵan densaýlyqqa qasaqana aýyr zııan keltirgeni úshin kináli dep tanyldy (QK 106 - babynyń 3-tarmaǵy) jáne oǵan 8 jyl merzimge bas bostandyǵynan aıyrý jazasy taǵaıyndaldy», - dep habarlady qalalyq sot.

Qaýly zańdy kúshine endi

Eske salaıyq, buǵan deıin Almatyda fıtnes jattyqtyrýshy atyp óltirgen azamatqa sot úkimi shyqqan bolatyn.