Ólketanýshy-tarıhshylardyń Soltústik lıgasy qurylatyn bolady
KÓKShETAÝ. QazAqparat - Býrabaı aýdanynyń «Zvezdnyı» balalar saýyqtyrý ortalyǵynda Aqmola oblysynyń bilim berý mekemeleriniń murajaılardy damytý baǵdarlamasy jobasy negizinde «Teach-in» úlgisinde «Balalarǵa arnalǵan ólketaný: ıdeıalar men tájirıbe» atty respýblıkalyq semınar bolyp ótti, dep habarlaıdy QazAqparat tilshisi.
Aqmola oblysy ishki saıasat basqarmasynyń deregi boıynsha bul semınarǵa Aqmola, Qaraǵandy, Soltústik Qazaqstan jáne Qostanaı oblystarynan 160 ustaz, ólketaný jáne týrıstik úıirme jetekshileri, tarıhshy-ǵylymdar qatysty. Osy shara sheńberinde teorııalyq jáne tájirıbelik dárister men sheberlik sabaqtary ótkizildi. «Mektep murajaıy jumysynyń belsendi jáne ınteraktıvti nysandary» dıalog alańy uıymdastyrylyp, tájirıbıe almasý boldy. Ǵalymdar men jastar úshin óńiraralyq zertteý ekspedıtsııalaryn uıymdastyrý, birlesken ádistemelik jáne ádisnamalyq, sonyń ishinde sandyq túrde oqý quraldaryn ázirleý boıynsha sheshimder qabyldandy.
Semınarǵa qatysýshylar elimizdiń injýi-marjany - Býrabaıdyń kórikti jerlerin, aýdandyq tarıhı-ólketaný murajaıyn, Býrabaı aýdanynyń vızıt ortalyǵyn, tabıǵat parkin aralap kórdi. Aqmola oblysynyń jas zertteýshi-ólketanýshylary daıyndaǵan beıne kórsetilimder usynyldy. Aqmolalyqtardyń bastamasymen tarıhshy-ólketanýshylardyń Soltústik lıgasyn qurý jóninde uıǵarym jasaldy.
«Elimizdiń barlyq aýmaqtarynda, Aqmola oblysynda da qasıetti oryndarǵa úlken qyzyǵýshylyq artyp keledi. Biz tarıhı-mádenı jáne tabıǵı murany maqtan tutyp, kelesi urpaqqa saqtap qalýymyz qajet», - dedi «Qasıetti Qazaqstan» ǵylymı-zertteý ortalyǵy basshysynyń orynbasary Batyrhan Jumabaev.
Qazir Aqmola oblysynda 205 mektep murajaıy jumys isteıdi. Bilim berý mekemeleriniń 140 murajaıynyń ekspozıtsııalary «Rýhanı jańǵyrý» taqyrybyn qamtıdy.
