Olımpıalyq sport túrlerin damytý dırektsııasynyń basshysy sottaldy

ASTANA. KAZINFORM - Olımpıada túrleri boıynsha sportty damytý dırektsııasynyń basshysy men qyzmetkeri bıýdjet qarajatyn jymqyrǵandary úshin sottaldy, dep habarlaıdy QR Bas prokýratýrasynyń baspasóz qyzmeti. 

Olımpıada túrleri boıynsha sportty damytý Dırektsııasynyń basshysy 60 mln teńgeden astam bıýdjet qarajatyn urlaǵany jáne qaramaǵyndaǵy qyzmetkerden 4 mln teńge kóleminde para alǵany úshin kináli dep tanyldy.

Sportshylarǵa arnalǵan sport zaldaryn tegin alý múmkindigi bola tura, olardy jalǵa alý týraly enshiles tulǵalarmen memlekettik satyp alý sharttary jasalyp, oqý-jattyǵý jıyndaryna bólingen bıýdjet qarajaty jymqyrylǵan.

Sonymen qatar, basshymen birge bıýdjet qarajatyn urlaýǵa kómekteskeni úshin Dırektsııa qyzmetkeri de sottaldy.

Memlekettik aıyptaýshy sotqa barlyq dáleldemelerdi usyna otyryp, sottalýshylardyń kinásizdigi týraly ýájderin joqqa shyǵardy.

Sot úkimimen árqaısysyna memlekettik qyzmette laýazymdardy atqarýǵa ómir boıyna tyıym salyna otyryp, basshy 5 jylǵa, al onyń kómektesýshisi 4 jylǵa bas bostandyǵynan aıyrý jazasyna sottaldy.

Úkim zańdy kúshine endi.