«Olımpıakos» komandasynyń oıynshylary Astanaǵa keldi

ASTANA. KAZINFORM – Grekııalyq «Olımpıakos» komandasynyń fýtbolshylary UEFA Chempıondar lıgasy negizgi kezeńiniń altynshy týrynda almatylyq «Kaıratpen» Astana qalasynda kezdesedi. 

«Astana-arena» stadıonynda ótetin oıyn 9 jeltoqsan kúni saǵat 20:20-da bastalady. Kezdesýdi «Qazaqstan» ulttyq telearnasynan tikeleı efırde tamashalaı alasyzdar.

«Olımpıakos» komandasy «Kaıratpen» oıyn aldynda tómendegi quramyn jarııalady. 

Qaqpashylar: Nıkolaos Botıs, Georgıos Kýraklıs, Konstantınos Dzolakıs;

Qorǵaýshylar: Fransısko Ortega, Jıýlıan Bıankon, Lorentso Pırola, Aleksıos Kalogeropýlos, Koshtınıa, Rodıneı, Brýno Onemaechı;

Jartylaı qorǵaýshylar: Dıogý Nasımentý, Jelson Martınsh, Danı Garsııa, Lorentso Shıpıonı, Chıkıno, Gabrıel Strefetstsa, Santıago Esse, Danıel Podense, Stavros Pnevmonıdıs Hrıstos Mýzakıtıs;

Shabýylshylar: Aıýb el-Kaabı, Roman ıAremchýk, Mehdı Taremı.

Kezdesýde ıspanııalyq Hýan Martınes bas tóreshi qyzmetin atqarsa, oǵan Raýl Kabanero men Inıgo Prıeto kómektesedi. Tórtinshi tóreshi de sol eldiń ókili – Haver Alberola.

«Olımpıakos» 1925 jyly qurylǵan. Óz elinde 48 márte chempıon bolǵan grekııalyq klýb rekordtyq kórsetkishke qol jetkizdi.

Almatylyq komanda Chempıondar lıgasynyń týrnırlik kestesinde bir upaımen 35-orynda keledi. Atalǵan týrnırde «Qaırat» portýgalııalyq «Sportıngten» 1:4, ıspanııalyq «Real Madrıdten» 0:5, ıtalııalyq «Interden» 1:2, danııalyq «Kopengagennen» 2:3 esebimen jeńilip qaldy. Al kıprlik «Pafos» komandasymen 0:0 esebimen teń tústi.

«Olımpıakos» komandasy bolsa týrnırlik kestede 2 upaımen 33-orynda keledi. Buǵan deıin kıprlik «Pafospen» 0:0, nıderlandtyq PSV klýbymen 1:1 esebimen teń tússe, anglııalyq «Arsenaldan» 0:2, ıspanııalyq «Barselonadan» 1:6, ıspanııalyq «Real Madrıdten» 3:4 esebimen jeńildi. 

Aıta ketsek, grekııalyq komanda qazaqstandyq «Astana» komandasymen 2016 jyly Eýropa lıgasynyń toptyq kezeńinde (1:1, 4:1) eki márte kezdesken.