Olımpıadashylar Tokıoǵa attandy
Qazaqstan UOK baspasóz qyzmeti málim etkendeı, Almatydan birinshi reıspen 128 adam Tokıoǵa attandy. Olardyń qatarynda sportshylar, bapkerler, dárigerler, ǵylymı-keshendi top músheleri, Olımpıadadaǵy Qazaqstan Mıssııasynyń ókilderi bar.
Tokıoǵa «Aqbulaq» olımpıadalyq bazasynan karateshiler, sadaq atýshylar, ústel tennısi men semserlesý komandasy, aýyr atletter men boksshylar attandy. Ózge de jattyǵý bazalarynan júzý sportynyń, sý doby sportynyń ókilderi, jeńil atletter, veloshabandozdar, stend atý men nysana kózdeýden qurama komandalar, sondaı-aq, dzıýdoshylar da Tokıoǵa jol tartty.
«Atletter eki aptalyq karantınde bolyp, sońǵy jattyǵý jıyndaryn Almaty qalasy men Almaty oblysynda ótkizdi. Oıyn qarsańyndaǵy sońǵy kúnderdi sportshylar oqshaýlaný rejıminde ótkizip, syrtqy álemmen baılanysqa túsken joq», - delingen habarlamada.
«Biz Olımpıada oıyndaryna qatysýshy sportshylardyń qaýipsizdigine baǵyttalǵan HOK pen Tokıo-2020 uıymdastyrý komıtetiniń barlyq talaptaryn oryndadyq. Ulttyq olımpıadalyq komıtet pen ulttyq federatsııalar sportshylardyń sapaly ári qaýipsiz daıyndalýyna bar jaǵdaıdy jasady. Bizdiń komandadaǵy 96 sportshy ortaq eńbegimizdiń jemisi. Sportshylar men bapkerlerge, sondaı-aq, sporttyq dárigerlerge birlesken jumysy úshin rahmet aıtamyz», - delingen Ulttyq olımpıadalyq komıtettiń jazbasynda.
Delegatsııanyń alǵashqy bóligi charterlik reıspen Almatydan Tokıoǵa ushyp ketti. Osy oraıda, barlyq qaýipsizdik sharalary saqtalǵan. Delegatsııanyń aeroport jáne áýekompanııa qyzmetkerlerimen baılanysqa meıilinshe az túsýi qadaǵalanýda. Avıatsııalyq qyzmetkerlerdiń barlyǵy da eki márte PTR synaqtan ótti.
28 shildege josparlanǵan ekinshi reıspen Japonııaǵa 43 adam jol tartady. Olardyń qatarynda balýandar, kórkem gımnastıkadan Qazaqstan komandasy, ártistik júzý, bessaıys jáne jeńil atletterdiń bir bóligi bar.
Jattyǵý kezinde arnaıy sporttyq bazalardy qajet etken sportshylardyń shamamen úshten bir bóligi karantın men daıyndyqtyń aqyrǵy kezeńin shetelde ótkizdi. Olar tikeleı Tokıony betke alady.
8 shildeden bastap Japonııada Olımpıada oıyndaryndaǵy Qazaqstan Mıssııasy jumysyn bastady. Qazaqstan elshiligi men SІM qoldaýy arqyly sportshylarmen kezdesýge qajetti zattar men jattyǵýǵa kerekti qosymsha qurylǵylardyń barlyǵy da daıyndaldy.
Olımpıada aýylyndaǵy tirshilik te karantın talaptaryna saı bolmaq. Túrli el komandalarynyń, ártúrli sport túrlerindegi atletterdiń ózara baılansýyna tyıym salynǵan. Olımpıadalyq aýyl men jattyǵý jáne sport zaldarynyń arasyndaǵy marshrýttan aýytqýǵa bolmaıdy, qoǵamdyq kólikti paıdalanýǵa ruqsat joq. Koronavırýsqa baılanysty kún saıyn test tapsyrý mindetti sanalady. Sonymen qatar, sportshylardyń júrgen orny men densaýlyq jaǵdaıyn baqylaıtyn birneshe qosymshalardy uıaly telefonǵa ornatý mindetteledi.
Qazaqstan olımpıadalyq komandasynyń sapynda 97 lıtsenzııa jeńip alǵan 96 sportshy bar.
Olımpıada oıyndarynyń ashylý saltanaty 23 shilde kúni Nur-Sultan ýaqytymen 17:00-de Tokıo stadıonynda bastalady.
