Olımpıadashy oqýshylar A.Sárinjipovten UBT-ny alyp tastaýdy surady
ASTANA. QazAqparat - Búgin Astanada QR Bilim jáne ǵylym mınıstri Aslan Sárinjipovpen kezdesýi barysynda fızıka páni boıynsha halyqaralyq olımpıadaǵa qatysatyn Qazaqstannyń ulttyq qurama komandasynyń úmitkerleri Ulttyq biryńǵaı testileýdi oqý júıesinen alyp tastaýdy surady, dep habarlaıdy QazAqparat tilshisi.
Qazaqstandyq oqýshylar aldynda qandaı túıtkilder baryn bilgisi kelgen A.Sárinjipovtiń saýalyna halyqaralyq olımpıadalarǵa qatysyp júrgen daryndy oqýshylar Qazaqstandaǵy UBT-ǵa qatysty máseleni kóterdi.
«Múmkin synaqtyń qurylymyn ózgertý kerek shyǵar. UBT-nyń ornyna basqa júıe ákelý kerek sııaqty. Biz halyqaralyq olımpıadalarǵa qatysatyn oqýshylar retinde UBT-dan bosatylǵanbyz, degenmen dostarymyz úshin surap otyrmyz», - deıdi O. Jáýtikov atyndaǵy Respýblıkalyq mamandandyrylǵan daryndy balalarǵa arnalǵan fızıka-matematıka orta mektep-ınternatynyń oqýshysy Tursynbek Nurıslam.
Oqýshylardyń sózine qaraǵanda, túlekter Qazaqstan tarıhyna qatysty suraqtarǵa jaýap berý kezinde qatty qınalatyn kórinedi, sebebi ol suraqtar qandaı prıntsıppen jáne qaıdan alynatynyn bilmeıdi. Sonymen qatar oqýshylar synaq barysynda jáne qatań tintý kezinde úlken psıhologııalyq kúızelisti sezinedi.
Aıta keteıik, búgin Astanada QR Bilim jáne ǵylym mınıstri Aslan Sárinjipov fızıka páni boıynsha halyqaralyq olımpıadaǵa qatysatyn Qazaqstannyń ulttyq qurama komandasynyń úmitker múshelerimen kezdesý ótkizgen bolatyn. Onda belgili bolǵanyndaı, 13-21 shilde kúnderi Astanada fızıka páni boıynsha halyqaralyq olımpıada ótedi.
