Olımpıadashylarymyz Kanvonnan elge sálem joldady

ASTANA. KAZINFORM – Búgin qazaqstandyq jasóspirim olımpıadashylarymyz baıraqty doda ótetin Ońtústik Koreıanyń Kanvon qalasynan elge sálem joldady.

Qazaqstandyq sportshylar olımpıadalyq qalashyq aldyna jınalyp, ózderiniń Olımpıadaǵa daıyndyǵy týraly aıtady. Sondaı-aq, medal úshin talasta aıanyp qalmaıtyndaryn jetkizip, sońynda «Qazaqstanǵa sálem» dep barlyǵy bir daýysta sálemin joldady.

Esterińizge sala keteıik, Olımpıada oıyndarynyń alaýy 19 qańtar kúni tutanady. Kanvon provıntsııasynyń Kannyn qalasynda ótetin jyldyń basty jarysynda Qazaqstan jasóspirimder quramasy sapynda 42 sportshy 5 sport túrinen baq synap, 55 júlde jıyntyǵyn sarapqa salady.

Atap aıtar bolsaq, bıatlon, kerlıng, konkımen júgirý, short-trek, shaıbaly hokkeı, shańǵy jarysy, shańǵymen tuǵyrdan sekirý, shańǵy qossaıysy, taý shańǵysy, frıstaıldan paralleldi mogýl boıynsha synǵa túsedi.

Kanvondaǵy qysqy jasóspirimder Olımpıadasy 1 aqpan kúni máresine jetedi. Atalǵan jarysqa álemniń 50 memleketinen 1 800 sportshy qatysady. 7 sport túrinen (15 dıstsıplına) 81 medal jıyntyǵy sarapqa salynady.

Olımpıadanyń ashylý saltanatynda Qazaqstan týyn konkımen júgirýden Petropavldan ulttyq quramanyń múshesi Krıstına Shýmekova men oraldyq short-trekshi Erasyl Shyńǵyshan alyp shyǵady.