Olımpıadanyń jabylý rásiminde kóptegen qyzyqty shoýlar josparlanǵan
PHENChHAN. QazAqparat - Ońtústik Koreıanyń Phenchhan qalasynda ótip jatqan HHIII qysqy Olımpıada oıyndarynyń jabylý rásimin «Habar» arnasy tikeleı efırde kórsetedi, dep habarlaıdy QazAqparat telearna saıtyna silteme jasap.
25 aqpan kúni Astana ýaqytymen saǵat 17.00-de «Habar» telearnasy Phenchhan qalasyndaǵy Aq Olımpıadanyń jabylý saltanatyn tikeleı efırden kórsetedi. XXIII Qysqy Olımpıada oıyndarynyń uıymdastyrýshylary atalmysh keshte dástúrli jáne zamanaýı mádenıetti bir arnada toǵystyrady. Olımpıada jankúıerleri Ońtústik Koreıanyń tanymal rep-oryndaýshy CL (Sı El) jáne EXO (Ekzo) tobynyń ónerin tamashalaıdy. Sonymen qatar ashylý saltanatynda este qalǵan «jarqyraýshy drondardyń» kómegimen keremet shoý qoıylady dep josparlanýda.
Jabylý saltanatynda tý kóterýshiler men sportshylar sherýi, barlyq qatysýshy memleketterdiń dostyq pen birliktiń sımvoly ispettes bir baǵytta júrip ótýi, úsh memleket Grekııa, Ońtústik Koreıa (2018 jylǵy Oıyndardy ótkizgen el retinde) jáne Qytaıdyń (kelesi oıyndardy qabyldaýshy el retinde) týlarynyń kóterilýi, Ońtústik Koreıa, Grekııa jáne Olımpıada oıyndarynyń ánuranynyń shyrqalýy, sondaı-aq Olımpıada jalaýyn Phenchhan qalasynyń meri Tomas Bahqa, al ol Beıjiń qalasynyń basshysyna berýi jáne Olımpıada alaýynyń sónýi syndy dástúrli elementter bolady. Kópjyldyq dástúr boıynsha jabylý saltanatynda shańǵy marafonynyń jeńimpazdaryna medaldar jıyntyǵy tabystalady.
