Olımpıadanyń segizinshi kúni: Júldege synyq súıem qalǵanda súrindik
Búgin Beıjiń olımpıadasynda short-trekten eń qysqa 500 metrlik qashyqtyqta kil myqtylar anyqtalyp, medaldar sarapqa salyndy.
Bul synda Qazaqstan atynan Abzal Ájiǵalıev, Denıs Nıkısha jáne Ádil Ǵalıahmetov el namysyn qorǵady.
Nátıjesinde Beıjiń Olımpıadasynda Qazaqstan týyn kóterip shyqqan Ájiǵalıev súrinbeı fınalǵa shyqty.
Osy sátte qazaq eli taqymyn qysyp, kógildir ekranǵa kózmaılaryn sýaryp, jan-tánderimen jankúıerlik tanytty. Fınalǵa da kelip jettik.
Átteń, taǵy da úmitimiz sý sepkendeı basyldy. Ájiǵalıev máre syzyǵyn tórtinshi bolyp kesip ótti.
Medalǵa synyq súıem jetpeı súrindi. Qarsylastarynan bar bolǵany bir-eki sekýnd artta qalyp qoıdy.
Biraq, bul - Ájiǵalıevtiń úlken sporttaǵy eń iri kórsetkishi edi. Tek onyń ǵana emes, short-trekten Qazaqstan ulttyq quramasynyń jalpy Olımpıada oıyndaryndaǵy eń iri jetistigi.
Osyǵan deıin qazaqstandyq short-trek sheberleri tórt jyldyq basty dodada mundaı kórsetkishke qol jetkizip kórmegen.
Sondaı-aq, Ádil Ǵalıahmetov shırek fınaldan jartylaı fınalǵa qol jetkize almady.
Al Denıs Nıkısha jartylaı fınalǵa shyqqanymen fınalda úzdikter qataryna kirmeı qaldy.
Mine, osylaısha Qazaqstan Olımpıadashylary búgin ózderiniń eń úzdik nátıjelerin tirkedi.
Endi ózge sport túrlerine toqtalyp ótsek, búgin Beıjińde ótip jatqan Olımpııa oıyndarynda qazaqstandyqtardan jarysty birinshi bolyp taý shańǵysynan alyp slalom boıynsha Zahar Kýchın jarys alańyna shyqty.
Ókinishke qaraı otandasymyz birinshi irikteý kezeńinde jarysty sońyna deıin aıaqtaı alǵan joq.
Odan keıin bıatlonnan áıelder arasynda iz kesý jarystary bastaldy. Atalǵan dodada qazaqstandyq bıatlonshy Galına Vıshnevskaıa-Sheporenko qatysyp, jalpy esepte Olımpıada oıyndaryn 52-orynmen aıaqtady. Bul otandasymyzdyń Beıjiń Olımpıadasyndaǵy sońǵy jarysy edi.
Sondaı-aq, búgin bıatlonnan erler arasynda 12,5 shaqyrymdyq iz kesý jarystary da óz máresine jetti.
Bul baǵdarlamada Qazaqstan namysyn Aleksandr Mýhın qorǵady. Ókinishke qaraı otandasymyz jarysty 57-shi bolyp aıaqtady.
Bul da Mýhınniń Beıjiń Olımpıadasyndaǵy sońǵy múmkindigi, ıaǵnı sońǵy jarysy edi. Alaıda ol úzdikter qatarynan kórine almady.
Búgin qazaqstandyq sportshylardan sońǵy bolyp konkımen júgirýden 500 qashyqtyqta áıelder arasynda Ekaterına Aıdova synǵa tústi.
Ol muz aıdynynda qytaılyq Taıbeıden kelgen Hýan ıÝ-Tınmen juptasyp júgirdi.
Jerlesimiz ekeýara jarysta máre syzyǵyn 38,54 sekýnd kórsetkishimen birinshi bolyp keskenimen jalpy esepte júldegerler qatarynan kórine alǵan joq.
Osy oraıda aıta keteıik, negizi búgin qazaqstandyq sportshylar Olımpıada oıyndarynda sporttyń 5 túrinen synǵa túsýi kerek bolatyn.
Tórt túrinen jarystar belgilengen kestege saı ótti.
Alaıda, búgin ótýi tıis frıstaıl akrobatıka jarysy aýa raıynyń qolaısyzdyǵyna baılanysty bir kún keıinge shegerildi.
