Olımpıadanyń qola júldegeri 5 jyldan soń sharshy alańǵa qaıta oraldy
Otandyq boksshy búgin Shymkentte bastalatyn Qazaqstan Spartakıadasynda baq synap kórmek
«Araǵa bes jyldaı ýaqyt salyp, sharshy alańǵa qaıta oraldym. Bul sheshimimdi joldasym, ata-enem, ákem, barlyǵy qoldady. Komandaǵa qaıta qosylatynymdy estigen boksshy qyzdar da lebizderin aıamaı jatyr. 
Buryn 75 kelide baq synaǵanmyn. Endi 69 kelide judyryqtasyp kóremin. Shyny kerek, úsh jarym jyl boıy eshqandaı jattyǵý jasamadym. Tipti, júgirgen joqpyn da... Ýaqyt óte kele, bokstyń maǵan qajet ekenin túsindim. Áli shamam bar, sondyqtan, ózimdi qaırap, synap kórmekpin.
Qazaqstan Spartakıadasyna Nur-Sultan atynan qatysamyn. Ózim de elorda turǵynymyn. Bárin osy jarys kórsetedi endi. Qazir meniń salmaǵymda básekelestik joǵary deńgeıde. Jas boksshylar óte kóp. Men óz tájirıbem kómekke keler degen oıdamyn. Eger bári sátimen bolsa, ári qaraı qurama komandaǵa ótsem degen tilek bar», - deıdi Marına Volnova.