Olımpıadanyń ashylý saltanaty kúni Sochı qalasynda qyzǵaldaqtar búr jarady
ASTANA. 22 qańtar. QazAqparat - Sochı Olımpıada qonaqtary men kórermenderin qarsy alýǵa qyzý daıyndyq ústinde. Munda qonaqtardyń aldy 24 qańtardan bastap kele bastaıdy, dep habarlaıdy ITAR-TASS. Qalanyń qyzmet kórsetý ortalyqtary «árdaıym ázir» rejımine kóshý ústinde.
«Temirjolshylar da Sochı baǵytyn betke alatyn jolaýshylar sanynyń kóp bolatyndyǵyn biledi. Soltústik Kavkaz temir jolymen 6 aqpannan bastap Adler-Krasnodar baǵytyndaǵy qosymsha № 604/603 jolaýshylar poıyzy jolǵa shyǵady. Ol shetkeri aýdandarda turatyn jurtshylyqty tasymaldaýǵa arnalady», - deıdi jol qyzmetiniń baspasóz qyzmetinen.
Saparjaılar men áýejaılarda týrısterdi erikti gıdter qarsy alatyn bolady, olar kelýshilerge qonaqúıler men Olımpıada obektilerine baratyn joldardy nusqap, kómek kórsetedi. Oıyndy uıymdastyrýda óz erkimen kómek qolyn usynǵandar kerek-jaraqtarmen, tegin SIM-kartalarymen qamtamasyz etildi, endi olar shıpajaı aımaǵynyń kartasymen egjeı-tegjeıli tanysyp jatyr.
Mádenı sharalar ótetin jáne jankúıerler jınalatyn alańdarda sportshylardy marapattaý saltanatyn jáne sahna juldyzdarynyń ónerin aýqymdy etip kórsetetin úlken ekrandardy ornatý jumystary aıaqtalyp qaldy.
2014 jylǵy oıyndar astanasynyń qonaqjaılylyǵyn pash etý isine kógaldandyrýshylar da óz úlesterin qospaq. Gúlzarlarda, saıabaqtar men sport obektilerine aparatyn joldardyń boıynda jarty mıllıonnan astam jupar ıisti gúlder otyrǵyzylady. Qalalyq sheneýnikter Olımpıadanyń ashylý saltanaty ótetin kúni Sochı qalasynda qyzǵaldaqtar gúldeıdi deıdi. Bul ósimdikter kóshethanalarǵa aldyn ala otyrǵyzylǵan, jaqynda gúlder búr jarmaq.
