Olımpıadanyń alqyzyl alaýy 10 mamyrda tutanady
ASTANA. 8 aqpan. QazAqparat - Ústimizdegi jyldyń 27 shildesi men 12 tamyzy aralyǵynda Londonda ótetin HHH jazǵy Olımpıada oıyndaryna qatysty keıbir qyzyqty aqparattar kópshilikke málim boldy.
«Alaman» ulttyq sport portalynyń málimetinshe, alqyzyl alaý 10 mamyrda, ádettegideı Olımp taýynda tutanady. Ol áýeli Grekııanyń birqatar aýmaǵyn aralap, 18 mamyrda arnaıy reıspen Ulybrıtanııadaǵy «Culdrose» áskerı-teńiz bazasyna jetkiziledi. Odan keıin alaý Anglııa, Ýels, Shotlandııa jáne Soltústik Irlandııa qalalaryn 70 kún boıy sharlaıdy. Bul rette ony 1018 eldi mekender arqyly alyp ótý kózdelýde. Olardyń arasynda ásem qalalar, jaqyn mańda ornalasqan araldar, tarıhı mekender, tańǵajaıyp nysandar men tabıǵat aıasyndaǵy jerlerdiń nazardan tys qalmaýyna basa nazar aýdarylǵan. Bul sharaǵa myńnan asa resmı tulǵalar, sportshylar, jýrnalıster jáne jergilikti turǵyndar qatysady. Alaý belgilengen jerlerge ushaq, keme, poıyz, tramvaı, qanat joldary, áýe shary, mototsıkl jáne velosıped arqyly jetkiziledi. Túrli salada qyzmet etip júrgen 8 myń adam alaýdy ustap shyǵý qurmetine ıe boldy. Eń sońynda ol Londonnyń barlyq aýdandaryn sharlap, Temza ózeni boıymen Hempton-kort saraıy arqyly 27 shildede Olımpıada oıyndarynyń ashylý saltanaty ótetin alyp stadıonǵa keledi.
