Olımpıadanyń kúmis júldegeri Nurbek Oralbaıǵa jerlesteri kólik syılady
TARAZ. KAZINFORM – Parıjde ótken HHHІІІ jazǵy Olımpıada oıyndarynda kúmis medal ıelengen bylǵary qolǵap sheberi Nurbek Oralbaı týǵan jerine taban tiredi. 80 keli salmaqta óner kórsetetin sportshy Jambyl oblysy Jambyl aýdany Aısha bıbi aýylynyń týmasy.
Bokstan jalǵyz fınalıst atanǵan Nurbekti qarsy alý sharasyna oblys ákimi Erbol Qarashókeev, jambyldyq sportshylar men qala turǵyndary qatysty. Saltanatty sharada oblys ákimi Erbol Shyraqpaıuly el senimin aqtaǵan Nurbek búginde qazaq boksynyń maqtanyshyna aınalǵanyn atap ótti.
«Shyn máninde, tórtjyldyqtyń basty básekesi sanalatyn Olımpııa oıyndarynda jeńis tuǵyryna kóterilý ońaı emes. Onyń bul jetistiginiń artynda talaı jyldar boıy jattyǵý zaly men sharshy alańda tókken teri, ata-anasynyń, týǵan-týysy men sport jankúıerleriniń qoldaýy jáne ózine degen senimi jatyr. Osy rette oǵan durys baǵyt-baǵdar berip, únemi qoldaý kórsetken jandarǵa alǵys aıtqym keledi. Aldyna bıik maqsat qoıyp, el abyroıyn asqaqtatqan Nurbek bolashaqta da jarqyn jeńisterimen qýantady degen senim mol», – deı kele, oblys ákimi sportshyǵa demeýshiler esebinen alynǵan «Huyndai Sonata» avtokóliginiń kiltin tabys etti.
Munan soń boksshy ystyq yqylaspen kútip alǵan jerlesterine rızashylyǵyn jetkizdi.
«Buıyrsa tórt jyldan keıin Los-Andjeles qalasynda ótetin jazǵy Olımpııa oıyndaryna qatyssam degen nıetim bar. Oǵan deıin bapkerlerimmen aqyldasyp, durys taktıka quratyn bolamyz. Osy joly tájirıbeniń azdyǵynan altyn júlde alý baqyty buıyrmady. Muhıttyń arǵy jaǵynda ótetin dúbirli dúrmekte osynaý olqylyqtyń ornyn toltyryp, jeńimpaz atanamyn dep oılaımyn», – dedi Nurbek Oralbaı.
Buǵan edıin Eldos Smetovke jerlesteri Lexus 600 kóligi men 5 bólmeli páter syılaǵanyn jazǵan bolatynbyz.
