Olımpıadanyń ashylý saltanaty: astanalyqtar ortalyq saıabaqqa jınaldy
ASTANA. KAZINFORM – Sanaýly sátten soń Parıj Olımpıadasy 2024 saltanatty túrde ashylady. Jibek Joly telearnasy elorda turǵyndary men qonaqtary úshin aýqymdy sharany tikeleı translıatsııada usynady. Kórermenniń bir parasy birlese tamashalaý úshin ortalyq saıabaqqa jınaldy.
Elordanyń ortalyq saıabaǵynda naǵyz merekelik qarbalas. Astana ákimdiginiń qoldaýymen úlken ekran ornatylǵan. Qazir astanalyqtar Jibek Joly telearnasynyń uıymdastyrýymen Olımpıadanyń ashylý saltanatyna oraı ashyq aspan astynda kontsert tamashalap jatyr.
«Olımpıadany otbasymyzben kóremiz, árıne, ózimizdiń sportshylarǵa jankúıer bolamyz. Parıj Olımpıadasyna jerlesim Aslanbek Shymbergenov attandy. Jerlesimiz 71 kelide baǵyn synaıdy, sáttilik tileımin. Búgin Olımpıadanyń ashylý rásimin tamashalaýǵa otbasymmen kelip otyrmyn. Kontsert ótetini týraly áleýmettik jeliden bildim», - deıdi elorda turǵyny Serikbaı Naýryzhan.
Qazaqstan estradasynyń juldyzdary da osynda. Sondaı-aq, kórermender arasynda utys oınatylyp jatyr.
«Men sportshy emespin, biraq sportty unatamyn. Ásirese boks janyma jaqyn, sportshylarymyz qorjyndy altynǵa toltyrsyn degen tilek bildiremin. Búgingi keshke otbasymmen qazaqstandyq sportshylarǵa qoldaý kórsetip kelip turmyz. Olımpıadanyń ashylý saltanatyn tamashalaýǵa arnaıy keldik», - dedi astanalyq Qanybek Ahmetov.
Aıta keteıik, Jibek Joly telearnasy Parıj Olımpıadasynyń ashylý saltanatyn jáne oıyndardyń birqataryn tikeleı efırde kórsetetini habarlanǵan bolatyn. Telearna efıriniń shamamen 70 paıyzy Parıj Olımpıadasy oıyndaryna arnalady.
Olımpıada kestesine sáıkes, telearna kórermeni erteń, 27 shilde saǵat 15:00-de úlken tennısti tamashalaı alady. Sondaı-aq bul oıyndy Abu Dhabi Plaza oıyn-saýyq jáne saýda ortalyǵy aýmaǵynda LED ekran arqyly kórýge de múmkindik bolady. Al saǵat 23:30-da júzýden jartylaı fınal jáne fınal ótedi.
Jeksenbi (28 shilde) kúni saǵat 12:30-da semserlesý, saǵat 17:10-da sporttyq gımnastıkadan erler arasynda fınal ótedi jáne saǵat 22:00-de semserlesýden fınal kórsetiledi.
