Olımpıadalyq komıtet «Habar» arnasymen birlesip, úzdik sportshylardy anyqtaıdy
ASTANA. QazAqparat - Qazaqstan Respýblıkasy Ulttyq Olımpıadalyq komıteti «Habar» agenttigimen birlesken «Jyldyń Ulttyq sporttyq júldesi» baıqaýyn ótkizedi, dep habarlaıdy QazAqparat tilshisi.
Baıqaý osy qarasha aıynda bir aı boıy jalǵasady. Árbir qazaqstandyq eń myqtylardy ózderi tańdaıtyn bolady.
Baıqaý Qazaqstan Respýblıkasy Ulttyq Olımpıadalyq komıtetiniń prezıdenti Tımýr Qulybaevtyń bastamasymen osymen úshinshi ret ótkizilip otyr. Buǵan deıingi jyldyń sporttyq syılyǵynyń jeńimpazdarynyń quramynda UOK pen QR Mádenıet jáne sport mınıstrliginiń ókilderi bar arnaıy komıssııa tańdap kelse, bıyl endi olardy jankúıerlerdiń ózderi anyqtamaq.
«Jyl ishindegi sporttyq kúntizbe túrli jarystarǵa toly bolady. Ár sport túri boıynsha halyqaralyq básekeler ótip jatady. Sol básekelerde bizdiń sportshylar el namysyn abyroımen qorǵap, jaqsy nátıjeler kórsetýde. Bıyl «Ulttyq» degen mártebe alyp otyrǵan «Sporttyq júlde» bıylǵy jyldy qorytyndylamaq. Biz barlyq jankúıerlerdi úzdikterdi anyqtaý sharasyna belsendi qatysýǵa shaqyramyz», - deıdi QR UOK Bas hatshysy Danııar Ábilǵazın.
«Habar» telearnasynyń dırektory Sandýǵash Raqymjanova: «Biz «Habar» telearnasynyń efırinde túrli sporttyq sharalardy kórsetip júrmiz. Baıqaǵanymyz sport adamdardy biriktiredi. Osy joly da jankúıerler súıikti sportshylaryna daýys berý úshin birigedi dep oılaımyz. Sporttyq júldeni kórermender 2 jeltoqsan kúni bizdiń arnamyzdan tamashalap, jaqsy áser alaryna senemiz»,-deıdi.
2017 jyly «Jyldyń Ulttyq sporttyq júldesi» jańa televızııalyq formatta ótedi. Jankúıerler ózderi tańdaǵan sportshyǵa daýystaryn bere alady. Daýys berý QR UOK www.olympic.kz resmı saıtynda qarashanyń 28-ne deıin jalǵasady. Osy aıdyń ortasynda júldeniń árbir nomınatsııasynda usynylǵan úmitkerler týraly, olardyń ústimizdegi jyldaǵy jetistikteri týraly tolyq málimet beretin arnaıy kúndelikter «Habar» arnasynda efırge shyqpaq.
Jeńimpazdar kelesi nomınatsııalar boıynsha anyqtalady:
1. «Jazǵy sport túrleri boıynsha úzdik sportshy»
2. «Qysqy sport túrleri boıynsha úzdik sportshy»
3. «Úzdik jas sportshy»
4. «Jazǵy sport túrleri boıynsha úzdik jattyqtyrýshy»
5. «Qysqy sport túrleri boıynsha úzdik jattyqtyrýshy»
6. «Olımpıadalyq sport túrleri boıynsha úzdik federatsııa»
7. «Úzdik sporttyq óńir» (respýblıkalyq mańyzy bar qalalar, oblystardyń dene shynyqtyrý jáne sport basqarmalary)
8. «Jyl jańalyǵy»
9. «Jyldyń úzdik komandasy»
Jyldyń sporttyq júldesiniń qorytyndysy saltanatty túrde ústimizdegi jyldyń 30 qarashasynda shyǵarylmaq. Jobaǵa «Hilton Astana» oteli, Toyota Motor Kazakhstan kompanııasy qoldaý bildirdi.
