Olımpıadalyq irikteý dodasynda qazaqstandyq D.Eleýsinov alǵashqy jeńiske qol jetkizdi
ASTANA. 7 sáýir. QazAqparat - Keshe Astanada ótip jatqan bokstan Olımpıadalyq irikteý dodasynyń ekinshi kúni qazaqstandyq Danııar Eleýsinov jeńiske jetti.
Óziniń alǵashqy kezdesýinde ıordanııalyq Ibrahım Salehti 27:4 esebimen tize búktirgen jerlesimiz Danııar Eleýsinov, endi shırek fınalda soltústik koreıalyq Chol Son Kımmen judyryqtasatyn bolady.
Esterińizge sala keteıik, 64 kelige deıingi salmaq dárejesinde 4 lıtsenzııa usynyldy, buǵan 16 boksshy talasýda. Osy salmaq boıynsha úshinshi jup bolyp shyqqan jerlesimiz Danııar Eleýsinov keshe óz jankúıerlerin qýantty. Ol óziniń qarsylasyn birinshi raýndtyń ózinde-aq tuqsyryp, rıng barysynda óziniń basymdyǵylyn tanyta bilgen edi. Sóıtip, saýatty boks kórsetken jerlesimiz alǵashqy raýndty 11:2 esebimen aıaqtady. Danııar Eleýsinov osy qarqyndy jekpe-jektiń sońyna deıin saqtap, ekpinin esh túsirgen joq. Ekinshi raýndtyń esebi 19:2 -men aıaqtalsa, sońǵy raýndtaǵy esep 27:4-ke jettti.
«Danııar bizdiń taktıkalyq nusqaýlarymyzdy oryndap shyqty, degenmen shamaly kemshilikter de jiberip aldy. Bundaı kemshilikke biz nazar aýdaratyn bolamyz. Árıne rıngke birinshi bolyp shyǵý qashanda aýyr. Sondyqtan da, biz budan keıingi jekpe-jekter jeńilirek bolady dep oılaımyz. Sonymen birge, búgingi kúni lıtsenzııa úshin talas júrip jatqanyn eske salǵym keledi, al olaı bolsa árbir jekpe-jekke bar kúshti salyp baǵý kerek», - dedi elimizdiń ulttyq quramasynyń bas jattyqtyrýshysy Myrzaǵalı Aıtjanov.
D. Eleýsinov 8 sáýir kúni Soltústik Koreıa boksshysy Chol Son Kımmen qolǵap túıistiretin bolady. Koreıa boksshysy buǵan deıin fılıppındik qarsylasynan basym túsken bolatyn.
